Aeroporti i Gjirokastrës “pushtohet” nga avionët italianë – Piloti Chianti për SCAN: Pika kyçe e jugut, do vijnë turistë elitarë

Alida Lula / SCAN

 

Gjirokastra po kthehet në një nga destinacionet më të preferuara të turistëve, jo vetëm për historinë dhe arkitekturën e veçantë që mbart qyteti, por edhe për turizmin ajror. Piloti italian Massimiliano Chianti, i cili ka ulur avionin e parë për qëllime turistike, thotë për SCAN tv se Gjirokastra është një prej atraksioneve më të veçanta dhe se rijëtësimi do të sjellë zhvillim ekonomik për gjithë jugun e vendit, kjo edhe në kushtet kur Aeroporti i Rinasit ka një fluks mjaft të lartë.

“Kam ardhur në Gjirokastër para dy vitesh, por kjo është hera e parë që vij si aereoturist. Gjirokastra është një qytet magjik, prandaj kemi vendosur të kalojmë disa ditë pushimesh këtu, qytet i cili ka ndër pamjet me të bukura që unë kam parë në jetën time. Aerodromi është thuajse perfekt, mungojnë vetëm disa gjëra të vogla për ta vendosur në funksion të turistëve si unë, që vijnë me avionë dhe duan të vizitojnë vende të reja. Ka nevojë për një doganë siç është pika kufitare e Kakavijes, një karburant dhe për tualete. Aeroporti i Tiranës është shumë i frekuentuar, prandaj këto jan mundësi marketimi për kompani ajrore dhe do të jetë perfekt për aeroportin e Gjirokastrës që të përdoret vetëm për turizëm”- thotë piloti italian për gazetaren Alida Lula.

Aerodromi i Gjirokastrës po pret gjithnjë e më shumë turistët e ajrit, jo vetëm parashutistë, por në pistë vijon prej muajsh të ulen avionë të vegjël sportivë. Për Chiantin mungesa e infrastrukturës së nevojshme, është pengesë edhe pse pista aktuale për avionët e vegël turstik është e përshtatshme. Sipas tij nga ky aeroport pritet të vijnë turistë që sjellin flukse të larta parash,

“Personat që ndërrmarin një udhëtim aereoturistik dhe pilotët, janë një kategori njerëzish që janë të gatshëm të përdorin një shumë të caktuar parash, prandaj ky nuk është një turizëm i nivelit të ulët ose të mesëm, por është turizëm i nivelit të lartë, plus duhet parë nëse do të fluturosh prej aeroportit të Tiranës, ku fluturimi zgjat rreth 45 min ose prej aeroportit të Vlorës, ku fluturimi do të zgjatë 10-15 min maksimumi, e kjo mund t’i ndihmojë shumë pilotët e tjerë që vijnë në Gjirokastër. Përshembull, unë me licencën time mund të marr në fluturim deri në 19 persona për fluturime të shkurtra. Kjo mund të rrisë cilësinë e pasagjerëve që fluturojnë duke e bërë Gjirokastrën dhe aeroportin e saj pikën më të rëndësishme dhe nje aeroport vetëm për turizëm. Mendoj që Gjirokastra, jo vetëm do të ishte pika kyce e jugut të Shqipërisë, por për të gjithë Shqipërinë.  Vetëm në Itali janë mbi 14.000 mijë aviona të tillë, në Europë mbi 100 mijë kështu, Gjirokastra do të ishte perfekte, ku vetëm në pak minuta mund të vizitosh Sarandën, Butrintin etj” – shton piloti italian.

Chiantin thekson impaktin ekonomik në turizëm që do të sjellë aeroporti i Gjirokastrës dhe ai i Vlorës. Madje i pyetur se kur do të jetë ardhja e tij e radhës me avionin turistik në Gjirokastër, ai ka thënë se do të jetë muajin e ardhshëm, madje me flamurin shqiptar. Investimi në Aerodromin e Gjirokastrës që përfshihet tek aeroportët e vegjël, ka një vlerë investimi prej 50 milionë euro.

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.