Ankesat për tenderët, institucionet që kryesojnë – KPP publikon listën me 14 autoritete kontraktore

Agjencia Shtetërore e Prokurimeve të Përqendruara, Agjencia Kombëtare e Shoqërisë së Informacionit dhe Bashkia Tiranë janë 3 institucionet që kryesojnë listën për numrin më të lartë të ankesave për procedura tenderuese.

Sipas të dhënave nga Komisioni i Prokurimit Publik për vitin 2023, operatorët ekonomikë depozituan 36 ankesa ndaj procedurave të zhvilluara nga Agjencia Shtetërore e Prokurimeve Publike, që renditet në vendin e parë në këtë drejtim. Ndërkohë, ndaj AKSHI-t u depozituan 15 ankesa, ndërsa ndaj Bashkisë Tiranë, 13 ankesa.

Në listën e publikuar nga Komisioni i Prokurimit Publik janë 14 institucione që numërojnë ankimimiet më të shumta, ku përvec 3 dikastereve të sipërpërmendur janë edhe Instituti i Sigurisë Ushqimore dhe Veterinarisë, Komisioni Qendror i Zgjedhjeve, shoqëria që administron inceneratorin e Elbasanit, ECO-ELB, Ujësjellës – Kanalizime Tiranë, etj. Në total, gjatë vitit 2023 u regjistruan 866 ankesa, që përfshijnë 205 autoritete kontraktore, teksa ankimimet janë depozituar nga 291 operatorë ekonomikë.

Në rang kombëtar janë ankimuar 11.7 % e procedurave të prokurimit mbi kufirin e blerjeve të vogla, dhe ankimuar 15.21 % e fondit limit të procedurave të publikuara. Në shumë raste Komisioni i Prokurimit Publik iu ka dhënë të drejtë operatorëve ekonomikë, duke urdhëruar autoritetet kontraktore ndryshimin e fituesve apo dokumenteve të tenderit.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.