Arabia Saudite, paga të “arta” për drejtuesit e bankave – Synimi i Riadit është zhvillimi i madh i sektorit financiar

Ndërsa grupet e mëdha bankare dhe gjigantët e teknologjisë në Perëndim po vendosin për pushime masive nga puna dhe reduktime pagash, vendet e punës në banka mbeten të shumta dhe pagat po rriten në një cep të botës që askush nuk do ta imagjinonte, në Arabinë Saudite. Aktualisht po ndodh një ‘boom’ pagash falë politikave ekspansioniste të princit të kurorës Mohammed bin Salman, i cili ka arkat e mbushura me para nga eksportet e naftës dhe është i vendosur ta bëjë vendin një fuqi ekonomike. Agjencitë shtetërore si Fondi i Investimeve Publike, me më shumë se 600 miliardë dollarë pasuri, shpesh punësojnë staf nga kompani të huaja me bazë në vend me shpejtësi marramendëse.

Rregullat e rrepta dhe perspektiva e një stili jetese monotone në Riad shpesh i bëjnë të huajt të hezitojnë të lëvizin atje, ndërsa punonjësit vendas me përvojë janë në mungesë. Kjo po nxit një konkurrencë për të gjetur talente dhe duke rritur pagat, thonë bankierët. Shumica e drejtuesve të bankave në Arabinë Saudite mund të fitojnë rreth 20 % më shumë se homologët e tyre në qendrat financiare perëndimore.

Sipas firmës Mark Williams, drejtuesit emigrantë që kërkojnë të zhvendosen atje nga Dubai fqinj mund të kenë 20% deri në 35% pagë shtesë. Punonjësit e lartë kanë aftësinë të kërkojnë edhe më shumë.

Pozicionet e zëvendëspresidentëve kanë një pagë vjetore prej 225 mijë deri në 255 mijë dollarë në Arabinë Saudite. Kjo është rreth 10% deri në 20% më e lartë se pagat në Londër, sipas një raporti të vitit 2022 nga Dartmouth Partners. Bonuset janë zakonisht më shumë se 100% e pagës së një bankieri.

Ndërkohë, Fondi i Investimeve Publike po punëson dhe po zgjerohet me shpejtësi dhe sot punëson 2000 persona, nga 40 që ishte një dekadë më parë. Ai po ofron 30 për qind rritje mbi pagat aktuale, sipas njerëzve të njohur me këtë çështje. Shumica e paketave përfshijnë gjithashtu tarifat e akomodimit dhe shkollimit, biletat e avionit të kthimit, si dhe një pagë pa taksa, që do të thotë se emigrantët që lëvizin në Arabinë Saudite nga vende të tilla si Britania e Madhe kanë një nxitje të madhe.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.