Ari, fitime javore prej 2.4% – Mbështetet nga frika për përshkallëzimin e tensionit në Lindjen e Mesme

Ari është rritur edhe në sesionin e sotëm, për shkak të tensioneve në Lindjen e Mesme, dhe pritet të publikojë fitime për të dytën javë me radhë. Çmimet janë mbështetur edhe nga pritshmëritë se Rezerva Federale mund të jetë drejt fundit të ciklit të rritjes së interesave. Kontratat “spot” për arin po tregtohet në rreth 1,980 dollarë për onz, ndërsa kontratat “futurës” në rreth 1995 dollarë për onz.

Shqetësimi kryesor i investitorëve është përshkallëzimi i mundshëm i konfliktit mes Izraelit dhe Hamasit edhe në vendet e tjera të rajonit. Për këtë arsye, investitorët janë pozicionuar tek asetet e sigurta. Ministri izraelit i Mbrojtjes, Yoav Gallant, sinjalizoi se shumë shpejt trupat izraelite mund të futen në Gaza, duke nënkuptuar se një pushtim tokësor për të asgjësuar Hamasin, mund të jetë afër. Ari, i përdorur shpesh si një strehë e sigurt gjatë periudhave të pasigurive politike dhe financiare, është rritur me 2.4% këtë javë.

Ndërkohë, Kryetari i Rezervës Federale, Jerome Powell, në komentet e tij në Klubin Ekonomik të Nju Jorkut ishte dakord se rritja e yield-eve po ndihmon në shtrëngimin e mëtejshëm të kushteve financiare, që e bën më pak të domosdoshme rritjen e interesave. Normat më të larta të interesit rrisin koston oportune të mbajtjes së arit.

Sipas një analize të Reuters, kontrata “spot” e arit pritet të zgjerojë fitimet në një interval prej 1,998-2,010 dollarë për onz, pasi ka thyer nivelin e rezistencës prej 1,972 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.