Franga, në nivelin më të lartë që nga 2015 – Mbështetet nga rritja e kërkesës për asete të sigurta

Dollari amerikan është dobësuar lehtë në sesionin e sotëm, pasi shefi i Rezervës Federale Jerome Powell sinjalizoi se cikli i rritjes së interesave mund të jetë drejt fundit. Ndërkohë, franga zvicerane ka prekur nivelin më të lartë që nga viti 2015 në raport me euron, pasi kjo monedhë ka përfituar nga statusi i saj si një “parajsë e sigurt” në periudha trazirash. Euro po tregtohet në rreth 0.94 franga, niveli më i ulët në tetë vitet e fundit, kur Banka Kombëtare e Zvicrës hoqi kufirin prej 1.2 të këmbimit të frangës me euron.

Në anën tjetër, dollari ka prekur përkohësisht nivelin e 150 në raport me jenin japonez, për shkak të rritjes së yield-it të obligacioneve 10-vjeçare amerikane pranë 5%. Lufta në Lindjen e Mesme ka rritur kërkesën për asete të sigurta, ku bën pjesë ari, franga zvicerane dhe dollari amerikan, por monedha e gjelbër është gjendur nën presion nga rritja e yield-eve të obligacioneve në SHBA.

Ndërkohë, presidenti i Bankës Qendrore Amerikane deklaroi se forca e ekonomisë amerikane dhe tregu i fortë i punës mund të kenë kërkojnë shtrëngim të kushteve të huamarrjes për të kontrolluar inflacionin. Por, ai shtoi se rritja e normave të interesit në tregje mund të reduktojë nevojën për rritjen e normës bazë të interesit nga banka qendrore. Ndërkohë, paundi britanik po qëndron në nivelin më të ulët në dy javët e fundit, pasi disa të dhëna të publikuara në Britaninë e Madhe treguan një rënie të besimit konsumator për tetorin.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.