Inflacioni ndikon ekonominë e SHBA – Fed lë të pandryshuara normat e interesit, pasi çmimet vijojnë të rriten

Në mbledhjen e saj të fundit, Rezerva Federale në SHBA la të pandryshuara normat e interesit midis 5.25% dhe 5.50%, në nivelin më të lartë në 23 vjet. Vendimi, në përputhje me pritshmëritë e analistëve, u motivua nga inflacioni që ishte ende shumë i lartë. Fed është “e angazhuar” për të rikthyer inflacionin në 2%, por ka pasur një mungesë progresi drejt objektivit në muajt e fundit.

Sipas kreut të Fed, Jerome Powell, treguesit e fundit sugjerojnë se aktiviteti ekonomik ka vazhduar të zgjerohet me një ritëm solid. Rritja e vendeve të punës mbeti e fortë dhe shkalla e papunësisë mbeti e ulët.

Për më tepër, Komiteti Federal i Tregut të Hapur (FOMC) “nuk pret që të jetë e përshtatshme të ulet diferenca e normës derisa të ketë besim më të madh se inflacioni po lëviz në mënyrë të qëndrueshme drejt 2%”. Vendimet e Komitetit u morën njëzëri, me 12 nga 12 vota pro dhe kjo ishte mbledhja e gjashtë radhazi në të cilën Fed la normat e pandryshuara.

Mesazhi i bankës qendrore amerikane pasqyron një ndryshim të mprehtë në kalendarin e saj të normave të interesit. Tashmë gjatë takimit të fundit më 20 mars, politikëbërësit e Fed kishin parashikuar tre ulje të normave në vitin 2024, ndoshta duke filluar nga qershori. Uljet e normës së Fed-it, me kalimin e kohës, do të reduktonin kostot e financimit për konsumatorët dhe bizneset. Por duke pasur parasysh vazhdimësinë e inflacionit të lartë, tregjet financiare presin tani vetëm një ulje të normës këtë vit, në nëntor.

Megjithatë, çmimet mesatare mbeten shumë mbi nivelet para pandemisë dhe kostot e shërbimeve që variojnë nga qiratë e apartamenteve dhe kujdesi shëndetësor deri te ushqimet e restoranteve dhe sigurimi i automjeteve vazhdojnë të rriten. Me zgjedhjet presidenciale gjashtë muaj larg, shumë amerikanë kanë shprehur pakënaqësi me ekonominë, veçanërisht me ritmin e rritjes së çmimeve.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.