Çmimet e bakrit arrijnë rekord në bursa – Kërkesa për metalin bazë pritet të rritet me rreth 5% këtë vit

Kontratat e bakrit arritën në një rekord, pasi kërkesa për metalin bazë mbetet e lartë mes një përshpejtimi për ndërtimin e qendrave të të dhënave dhe kërkesës së vazhdueshme për energji të ekonomisë globale. Çmimet e bakrit në bursë arritën në 5,02 dollarë për paund, duke fituar më shumë se 25% deri më tani, përgjatë këtij viti.

Kërkesa për bakër konsiderohet gjerësisht si një tregues për shëndetin ekonomik, me metalin që është çelësi i ekosistemit të tranzicionit të energjisë. Është integrale për prodhimin e automjeteve elektrike, rrjeteve të energjisë dhe turbinave, veçanërisht gjatë kohës që ekonomia globale elektrizohet.

Sipas parashikimeve të Bankës së Amerikës, kërkesa për bakër nga automjetet elektrike dhe sektori i transportit në përgjithësi pritet të rritet me rreth 5% këtë vit. Bakri është gjithashtu një material kyç për kabllot që përdoren në qendrat për ruajtjen e të dhënave, rritja e të cilit ka nxitur kërkesën për metalin e kuq, veçanërisht pasi një bum i inteligjencës artificiale gjeneron më shumë nevojë për to.

Agjencia Ndërkombëtare e Energjisë pret që kërkesa për energji nga qendrat e të dhënave të dyfishohet në mbi 1000 teravat-orë (TWh) në 2026 nga 460 TWh që ishte në vitin 2022. Grupi Ndërkombëtar i Studimit të Bakrit (ICSG) ka ulur parashikimet për metalin këtë vit për shkak të prodhimit më të ulët se sa pritej nga minierat.

Parashikimi i rritjes së prodhimit të bakrit për vitin 2024 është ulur në 0.5% krahasuar me një rritje prej 3.7% të vlerësuar nga ICSG tetorin e kaluar. Kjo kryesisht i detyrohet një rritjeje më të ngadaltë se sa pritej të prodhimit, vonesave në vënien në punë të projektit dhe udhëzimeve të rishikuara të prodhimit nga prodhuesit kryesorë.

Nëntorin e kaluar, First Quantum Minerals ndaloi prodhimin në Cobre Panamá, një nga minierat më të mëdha të bakrit në botë, pas një vendimi të Gjykatës së Lartë dhe protestave mbarëkombëtare për shqetësimet mjedisore. Anglo American, një kompani e madhe prodhimi, tha se do të zvogëlojë prodhimin e bakrit në 2024 dhe 2025 pasi kërkon të ulë kostot.

Adelina Onuzi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.