Ari i afrohet sërish 2,000 USD – Mbështetet nga rënie e yield-eve të obligacioneve në SHBA

Ari po qëndron në rritje në sesionin e sotëm, i mbështetur nga rënia e yield-it të obligacioneve amerikane, por po tregtohet pranë nivelit më të ulët në 3 javët e fundit. Investitorët po presin edhe përfundimin e takimit 2-ditor të Rezervës Federale në mbrëmjen e sotme. Ari po tregtohet në rreth 1997 dollarë për onz, ndërsa argjendi po tregtohet në rreth 23 dollarë për onz.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rritje me rreth 0.2%, por rënia e yield-it të obligacioneve amerikane po ofron një mbështetje për çmimet. Analistët shprehen se metali i verdhë po rivlerësohet nga ajo që po ndodh në tregun e yield-eve, sepse investitorët kanë qenë jashtëzakonisht të sigurt se Rezerva Federale do të ulë shpejt normat e interesit, në pjesën e parë të 2024. Por, tani tregu është më pak i sigurt për këtë skenar.

Fed pritet të lërë normat e interesit të pandryshuara në 5.25%-5.5%, por tregjet po vlerësojnë një shans prej 43% për një ulje të normave në mars dhe një shans prej 75% për një ulje në maj. Investitorët do të shikojnë për ndonjë detaj në komentet e Jerome Powell, për të përcaktuar perspektivën e politikës monetare.

Tregjet po presin edhe takimet e politikës monetare të Bankës Qendrore Evropiane dhe Bankës së Anglisë të enjten. Ndër metalet e tjera, platini ka humbur mbi 1% të vlerës dhe po tregtohet në rreth 917 dollarë për onz, ndërsa paladiumi po tregtohet në rreth 965 dollarë për onz.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.