Ari, i qëndrueshëm pranë 2015 USD – Tregtohet në nivelin më të lartë në gjashtë muajt e fundit

Ari po tregtohet i qëndrueshëm pranë nivelit më të lartë në 6 muajt e fundit, edhe në sesionin e sotëm, për shkak të pritshmërive se Rezerva Federale në SHBA mund t;i ketë dhënë fund ciklit të shtrëngimit të politikave monetare. Metali i çmuar po tregtohet në rreth 2015 dollarë për onz, niveli më i lartë që nga 16 maji.

Ulja e yield-it të obligacioneve në SHBA dhe parashikimet se FED do të ulë interesat më herët se vlerësimet kanë bërë që ari të shkëlqejë në tregje. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në nivelin më të ulët që nga gushti, duke e bërë arin më pak të shtrenjtë për zotëruesit e monedhave të tjera.

Të dhënat e fundit në SHBA kanë treguar shenja të ngadalësimit të inflacionit dhe kanë rritur pritshmëritë se banka qendrore mund të fillojë të lehtësojë kushtet monetare më shpejt se sa pritej. Të enjten do të publikohen edhe të dhënat mbi Shpenzimet e Konsumit Personal, që është një matës i preferuar i inflacionit nga Rezerva Federale.

Normat më të ulëta të interesit reduktojnë koston oportune të mbajtjes së arit, i cili nuk jep interes. Investitorët po presin edhe të dhënat e rishikuara mbi Prodhimin e Brendshëm Bruto në SHBA, për tremujorin e tretë të vitit. Ndër metalet e tjera, ari po tregtohet në rreth 24.5 dollarë për onz, ndërsa platini po tregtohet në rreth 915 dollarë për onz.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.