Automjetet elektrike kineze mbeten stok – Misteri i mijëra të tillave të braktisura prej kohësh
Prej vitesh kanë mbërritur video nga Kina ku shfaqen fusha me mijëra automjete të braktisura, kryesisht elektrike, të cilat ngjallin interes në internet: kurioziteti është i dukshëm, për të kuptuar pse këto automjete përfunduan në një vend të tillë dhe cili është fati i tyre. Bloomberg TV ka hetuar misterin dhe me ndihmën e imazheve satelitore dhe dronëve i ka dhënë një përgjigje pyetjes. Këto hapësira të mbushura me automjete elektrike nuk janë një incident i izoluar, pasi janë parë në dhjetëra qytete kineze që në vitin 2019. Ka një numër të madh automjetesh elektrike identike dhe shpesh relativisht moderne të parkuara shumë pranë njëra-tjetrës. Shumica duket se janë braktisur prej një kohe të gjatë
Pas misterit qëndron rënia tronditëse e tregut dikur në lulëzim të shpërndarjes së automjeteve elektrike në Kinë. Në industrinë e automobilave, përfundimi i stimujve të kombinuar me faktorë të tjerë, përfshirë mungesën e parkimit falas dhe ardhjen e gjeneratës së re dhe më të sofistikuar të automjeteve elektrike – ato që kanë mbërritur dhe po vijnë në tregun europian, ka bërë që modelet e vjetra të dalin nga skena duke falimentuar një numër të madh biznesesh të reja.
Kina aktualisht po bëhet tregu më i madh në botë, duke zënë 60% të flotës globale të automjeteve elektrike. Kjo përkundër faktit se numri i prodhuesve vendas të automjeteve elektrike ka rënë nga pothuajse 500 në vitin 2019 në rreth 100 në vitin 2023. Ky është një tregues i një serioziteti më të madh të prodhuesve, të cilët janë gjithashtu të vetëdijshëm se pa vëmendje më të madhe ndaj mjedisit, do ta gjenin rrugën të bllokuar në Kontinentin e Vjetër.
Megjithatë, problemi mjedisor i mijëra automjeteve të vogla elektrike që do të asgjësohen, mbetet. Bloomberg TV i përshkruan makinat e braktisura si “një paraqitje befasuese e tepricave dhe mbetjeve që mund të ndodhin kur kapitali rrjedh në një industri në lulëzim, dhe ndoshta edhe një monument i çuditshëm për përparimin sizmik të transportit elektrik në vitet e fundit.” . Sipas Qendrës Kineze të Teknologjisë dhe Kërkimit të Automobilave, heqja e baterive kineze të automjeteve elektrike që ishte rreth 200 mijë ton në vitin 2020, do të rritet në 780 mijë ton deri në vitin 2025: do të ketë një pushtim të vërtetë të baterive të konsumuara për t’u asgjësuar.
Nga hetimi dalin aspekte shqetësuese: bateritë e konsumuara vendosen në një treg të zi për riciklim, me zero garanci që materialet toksike nuk do të përfundojnë në tokë apo në mjedis. Sipas mediave shtetërore kineze, çmimi i riciklimit të baterive të automjeteve me litium varion nga 1250 deri në 1563 dollarë për ton. Por çmimet zyrtare janë shumë më të larta se ato në tregun e zi, ku nuk ka kontroll mbi atë që asgjësohet, kështu që llogaritet se 80% e këtyre baterive të mbetura i nënshtrohen proceseve të ‘errëta’.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.