Bakri, ari i kuq i digjitalizimit – Çmimet kanë prekur “majat” dhe do të vijojnë rritjen

Për një kohë të gjatë, çmimi i bakrit nuk është luhatur shumë në tregje dhe nuk luajti një rol të madh për investitorët. Por, kjo ecuri duket se po ndryshon. Metali i kuq ka arritur vlerën prej 10.000 dollarë për ton që nga prilli. Deri atëherë, kishte pasur një korelacion të besueshëm midis rritjes ekonomike globale dhe kërkesës për bakër. Por tani kërkesa po rritet ndjeshëm pavarësisht të dhënave të dobëta të rritjes globale.

Çmimi i lëndës së parë të rëndësishme në bursën e metaleve të Londrës u rrit deri në 1.7%, në 10.033 dollarë për ton më 1 maj. Kjo e bëri atë më të shtrenjtë se sa ka qenë që nga prilli 2022.

Për shkak të vetive të tij fizike, veçanërisht përçueshmërisë së tij elektrike, bakri është lënda e parë më e rëndësishme për tranzicionin energjetik. Nëse vërtet duam të largohemi nga lëndët djegëse fosile, do të na duhet përafërsisht e njëjta sasi bakri në tre dekadat e ardhshme. Sipas analistëve të tregjeve, dekarbonizimi i ekonomisë ishte arsyeja kryesore për rritjen e çmimeve. Bakri përdoret pothuajse në çdo industri dhe për këtë arsye konsiderohet një tregues ekonomik.

Kërkesa e madhe po rrit edhe çmimet. Analistët shprehen se gjatë 10 viteve të fundit nuk janë kryer investime në miniera. Duke përdorur të dhënat e mbledhura nga Agjencia Ndërkombëtare e Energjisë, mund të vlerësohet se cila do të jetë kërkesa vjetore për bakër deri në vitin 2050. Më pas mund të llogaritet se sa duhet të investohen në miniera të reja, të paktën 127 miliardë dollarë në vit. Që nga viti 2012, deri në 2023-shin u investuan vetëm 104 miliardë dollar.

Sipas analistëve, edhe nëse çmimi i bakrit vazhdon të rritet, prodhimi nuk mund të rritet me të njëjtën shpejtësi, sepse duhen deri në 15 vjet nga nxjerrjet e para deri në prodhim, ndërkohë, që minierat e reja duhet të projektohen që të jenë më të mëdha. Por, në këtë pikë ka rezistencë nga ambientalistët, pasi nxjerrja e bakrit ndot mjedisin.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.