Bankat perëndimore paguajnë 800 mln euro taksa në Rusi – Pjesa më e madhe e tyre nuk reduktojnë dot ekspozimin

Bankat më të mëdha perëndimore që kanë mbetur në Rusi i kanë paguar Kremlinit më shumë se 800 milionë euro taksa, vitin e kaluar. Një shifër katër herë më e lartë se në nivelet e para luftës në Ukrainë, pavarësisht premtimeve për të reduktuar në minimum ekspozimin e tyre pas pushtimit të Ukrainës.

Të dhënat janë publikuar pas një hetimi të Financial Times, sipas të cilit shtatë bankat kryesore europiane në bazë të aktivitetit në Rusi – – Raiffeisen Bank International, Ing, Commerzbank, Deutsche Bank, Otp por dhe italianet Unicredit e Intesa Sanpaolo – kanë regjistruar një fitim të kombinuar prej më shumë se 3 miliard eurosh në vitin 2023.

Këto fitime janë tre herë më të larta se ato të vitit 2021 dhe pjesërisht kanë ardhur nga fonde që bankat nuk mund të tërheqin në vend. Rritja e fitimeve ka bërë që bankat europiane të paguajnë rreth 800 milion euro taksa, në krahasim me 200 milion euro në vitin 2021, sipas analizës së Financial Times. Një shifër e tillë i shtohet fitimeve të instituteve amerikane të kreditimit si Citigroup e JPMorgan.

Taksat e paguara nga bankat europiane, të barazvlefshme me rreth 0.4% të të gjitha të hyrave të buxhetit rus jo energjetik të parashikuara për 2024-ën, janë një shembull se si shoqëri të huaja që kanë mbetur në vend ndihmojnë Kremlinin të ruajë qëndrueshmërinë financiare pavarësisht sanksioneve perëndimore.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.