BE mbështet përdorimin e detyrueshëm të karburantit të gjelbër të avionëve nga viti 2025!

Parlamenti Europian mbështeti të enjten rregullat historike për karburantin e aviacionit që vendosin objektiva detyrues për zëvendësimin e naftës (kerosene) me burime më pak ndotëse të energjisë, por zgjeroi përkufizimin se çfarë mund të jetë një karburant i gjelbër.

Kërkesat, të cilat nëse miratohen do të ishin të parat në botë, u propozuan fillimisht nga Komisioni Ekzekutiv Europian vitin e kaluar për të ulur ndikimin klimatik të sektorit të aviacionit, i cili konsiderohet përgjegjës për deri në 3% të emetimeve globale.

Sipas tekstit të miratuar, furnizuesve do t’u kërkohet të përziejnë një minimum prej 2% të karburantit të qëndrueshëm të aviacionit (SAF) në naftën e tyre nga viti 2025, duke u rritur në 85% në 2050 – më ambicioz se objektivi prej 63% deri në vitin 2050 i propozuar fillimisht nga Komisioni.

Sipas kushteve të propozimit origjinal të Komisionit, SAF do të përfshijë lëndë djegëse me bazë bio të marra nga mbetjet e ricikluara dhe, në një shkallë më të vogël, sintetike me bazë hidrogjeni ose karburante elektronike të prodhuara nga burimet e rinovueshme të energjisë.

Por versioni i rregullave të miratuara nga Parlamenti Europian zgjeroi përkufizimin origjinal të Komisionit për SAF, duke shtuar lëndë djegëse karboni të ricikluar të prodhuar nga gazi i përpunimit të mbeturinave dhe biokarburantet e prodhuara nga yndyrat shtazore ose distilimet.

Përpara votimit, komisioneri i BE-së për energjinë Kadri Simson u kishte kërkuar ligjvënësve të mos e zgjeronin përkufizimin e SAF dhe të ishin të kujdesshëm me objektivat tepër ambicioz.

Ligjvënësit e gjelbër arritën të ndryshojnë tekstin në minutën e fundit për të përjashtuar përdorimin e kulturave ushqimore dhe vajit të palmës si SAF, të cilat do të ishin lejuar në rrethana të jashtëzakonshme në tekstin e përgatitur fillimisht nga Parlamenti.

Rregullat tani do të paraqiten për miratim nga qeveritë anëtare dhe Komisioni i BE-së.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.