Biden propozon taksë minimale prej 25% për miliarderët – Plani i presidentit amerikan dhe dyfishimi i taksës për fitimet kapitale

Presidenti i Shteteve të Bashkuara të Amerikës, Joe Biden, do t’i bëjë thirrje Kongresit që të vendosë një taksë minimale prej 25% për miliarderët, si pjesë e një sërë rritjesh të propozuara të taksave për individët e pasur dhe korporatat.

Plani i propozuar i shpenzimeve nga Biden do të dyfishonte gjithashtu taksën e fitimeve kapitale për investime nga 20% në 39.6% dhe do të heqë taksat mbi të ardhurat ndaj korporatave dhe amerikanëve të pasur, sipas raportimeve të Bloomberg.

Biden do të publikojë planin e tij buxhetor, në një moment që republikanët dhe demokratët vazhdojnë të përplasen për taksat, shpenzimet dhe reduktimin e borxhit, duke nisur ato që ka të ngjarë të jenë negociata të vështira midis Shtëpisë së Bardhë dhe një Kongresit.

Plani i shpenzimeve vjen në një kohë ndërsa republikanët dhe Shtëpia e Bardhë janë bllokuar në një ngërç për rritjen e tavanit të borxhit, shumën totale të parave që qeveria federale lejohet të marrë hua, në mes të një borxhi kombëtar aktual prej 31 trilion dollarësh.

Republikanët kanë argumentuar se tavani nuk duhet të rritet pa reduktime të konsiderueshme të shpenzimeve dhe kanë hedhur poshtë kërkesat për taksa më të larta.

Biden është shprehur se plani i tij do të ulë deficitin me gati 3 trilionë dollarë gjatë 10 viteve, kryesisht nëpërmjet rritjes së taksave. Republikanët kanë shumicën në Dhomën e Përfaqësuesve, me Demokratët që kontrollojnë Senatin. Gjatë fjalimit të tij për gjendjen e vendit në shkurt, Biden i bëri thirrje kongresit të mbështesë idenë e taksave më të larta për të pasurit dhe “të shpërblejë punën, jo vetëm pasurinë”.

Presidenti ka këmbëngulur se rritja e propozuar e tij e taksave do të prekë vetëm një përqindje të vogël të amerikanëve, duke thënë se ata me një pagë vjetore prej më pak se 400 mijë dollarë nuk do të paguajnë asnjë qindarkë shtesë në asnjë taksë.

Biden vitin e kaluar propozoi një taksë minimale mbi të ardhurat e miliarderëve për të siguruar që familjet me të ardhura prej më shumë se 100 milionë dollarë të paguajnë të paktën 20% në taksa si për të ardhurat, ashtu edhe për fitimet e parealizuara nga investimet.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.