Bitcoin ngjitet sërish në 36,000 USD – Rikuperon pjesërish humbjet, investitorët optimistë për të ardhmen

Tregu i kriptomonedhave i është rikthyer fitimeve në sesionin e së mërkurës, pas humbjeve të realizuara një ditë më parë. Në këtë mënyrë, bitcoin është ngjitur sërish pranë nivelit të 36 mijë dollarëve. Analistët shprehen se tregu po përpiqet të gjejë një stabilitet, ndërsa muajin e kaluar bitcoin fitoi 37% të vlerës.

Kjo rritje e dukshme e çmimit ka rikthyer interesin dhe motivimin e investitorëve në hapësirën e kriptove, pas një periudhe në stanjacion. Gjithashtu, analistët dhe ekspertët e tregut janë optimistë për perspektivën e kriptove edhe për dy muajt e mbetur të vitit. Kjo ndjenjë e ripërtërirë rritëse pason një rikuperim të fuqishëm gjatë nëntë muajve të parë të vitit, periudhë gjatë së cilës bitcoin është rritur me 124%. Sipas analistëve ka pasur disa faktorë kyç, që kanë ndikuar në këtë rritje. Së pari është pauza ne rritjen e interesave nga Rezerva Federale.

Në dy takimet e fundit, banka qendrore amerikane e ka mbajtur të pandryshuar në intervalin nga 5.25%-5.5%, normën bazë të interesit, vendim që ka pasur një ndikim të rëndësishëm në rritjen e kriptomonedhave.

Një shtytës tjetër i rëndësishëm i optimizmit të investitorëve është pritshmëria që Komisioni i Letrave me Vlerë dhe Shkëmbime në SHBA të miratojë fondet e tregtuara në shkëmbim në bitcoin (ETF). Miratimi i një ETF-je të tillë do të ishte një moment historik për tregun e kriptomonedhave, pasi do t’u siguronte investitorëve tradicionalë një rrugë të rregulluar për të investuar në bitcoin dhe në kriptovaluta të tjera, përmes tregjeve të rregullta të aksioneve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.