Bizneset “dënohen” për shkeljet në punë – Penalizohen mbi 1400 subjekte, futen në skemën e sigurimeve 1 mijë punonjës!
Mbi 1400 subjekte private dhe shtetërore janë “dënuar” për shkelje të rregullave të punës. Referuar raportit vjetor të Inspektoriatit Shtetëror të Punës për vitin që lam pas, në total janë kontrolluar me procedurë standarde inspektimi online 7039 subjekte ekonomike private e shtetërore ku janë evidentuar të punësuar 184,206 punëmarrës.
Gjatë kontrolleve, Inspektoritati ka gjetur shkelje dhe ka marrë masa administrative për 1440 subjekte në total, nga të cilat për 578 prej tyre janë pezulluar për shkelje të dispozitave ligjore të marrëdhënieve të punës dhe sigurisë e shëndetit në punë dhe 760 subjekteve të tjera u është dhënë masa “paralajmërim”.
Ndërsa 102 subjekte janë gjobitur për shkelje në marrëdhëniet e punës me një vlerë totale prej 22.4 milionë lekë. Numri më i lartë i shkeljeve rezulton në Tiranë dhe Durrës. Sa i takon infomalitetit në punë, sipas raportit, gjatë gjatë vitit 2021 janë evidentuar 1092 punëmarrës informal ku gjatë procesit të inspektimit janë siguruar 1041 prej tyre, nëpërmjet masës urgjente “pezullim” të aktivitetit deri në sigurimin e tyre.
Ndërkohë të pasiguruarit janë raportuar pranë zyrave të tatim taksave. 68 % e punëmarrësve informal janë konstatuar në inspektime të planifikuara të cilat kanë nisur nga muaji qershor e në vazhdim gjatë vitit, shkak kjo i përfshirjes së inspektoreve të punës, në monitorimin e masave anticovid për gjatë periudhës janar-qershor 2021.
18 % e punëmarrësve informal të konstatuar janë evidentuar në inspektime për shkak ankese. 13 % e punëmarrësve informal janë konstatuar në inspektime rastësore të cilat janë iniciuar si shkak i shkeljeve flagrante të kërkesave ligjore. Informaliteti i evidentuar kundrejt subjekteve të kontrolluara vlerësohet në masën 15 për qind.
Elisabeta Dosku / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.