Biznesi ka të ardhura të bollshme, nevojë e ulët për kredi – Vrojtimi/Të pranishëm faktorë dekurajues, likuiditeti i lartë dhe normat e interesit

Gjatë tremujorit të tretë të vitit biznesi në vend ka shfaqur nevojë të reduktuar për financim për shkak të situatës së favorshme të likuiditetit, duke ju drejtuar më së shumti bankave për kredi për investime. Sipas vrojtimit të Bankës së Shqipërisë, kërkesa për kredi e biznesit po ndikohet nga faktorë dekurajues, të tillë si ambienti i normave të larta të interesit, si edhe disponueshmëria e likuiditeteve të larta nga ana e sipërmarrjeve.

Shtimi i kërkesës për kredi u raportua veçanërisht i lartë për financimin e investimeve. Biznesi i madh mbetet udhëheqësi kryesor në këtë drejtim, ndonëse kërkesa për kredi në financimin e investimeve është raportuar e lartë për të dyja madhësitë e biznesit. Përmirësimi i besimit të biznesit, si edhe perspektiva e pritur në disa sektorë të veçantë të ekonomisë, ndër të tjera, kanë shtyrë kryesisht bizneset e mëdha të zgjerojnë më tej kapacitetet e tyre prodhuese.

Vrojtimi konkludon se standardet e kreditimit për bizneset mbetën të pandryshuara në tremujorin e tretë të vitit 2023. Standarde të pandryshuara u aplikuan në kreditë akorduar biznesit të madh, në kreditë për financimin e investimeve, si edhe në ato për mbulimin e nevojave për likuiditet. Standardet e kreditimit u shtrënguan disi vetëm në segmentin e biznesit të vogël e të mesëm, të raportuara si të tilla nga një bankë e vetme. Ndërkaq, në të kundërt të individëve, shkalla e miratimit të kredive për bizneset u raportua më e lartë në tremujorin e tretë. Numri më i lartë i miratimeve/rënia e shkallës së refuzimeve u mbështet nga statusi i kredive aktuale, si edhe nga shtimi i kursimeve nga ana e bizneseve. Të ardhurat nga ushtrimi i aktivitetit, perceptimi i bankave mbi rrezikun për gjendjen e ardhshme financiare dhe për perspektivën e sektorit ku operojnë bizneset, ndikuan në kahun rritës për shkallën e refuzimit të kredive për bizneset.

Lorenc Rabeta /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.