Biznesi “presion” qeverisë për rënien e euros: “Merrni masa, do shkurtojmë vende pune dhe nuk do rrisim pagat”!

Zhvlerësimi i euros ka dëmtuar shumë sipërmarrjet prodhuese dhe eksportuese në vend, fenomen për të cilin ende nuk është marrë asnjë masë nga qeveria. Shoqatat e bizneseve në sektorë të ndryshëm si dhe grupet e interesit i kanë dërguar një letër Ministrisë së Financave dhe Bankës së Shqipërisë, ku i shpjegojnë efektet e kursit të këmbimit, pasojat dhe kërkojnë ndërhyrje.

Konkretisht në letrën dërguar këtyre institucioneve thuhet se: “zhvlerësimi i monedhës euro ka dëmtuar shumë rëndë industrinë prodhuese, eksportuese dhe turizmin vendas duke drejtuar shumë subjekte drejt falimentimit.

Ky fenomen negativ iu kushton masivisht qytetarëve shqiptarë humbjen e vendeve të punës, reduktimin e mundësive për vende të reja pune, dhe në mënyrë të pashmangshme mosrritjen në vazhdim të pagës për afro 200 mijë të punësuar në ndërmarrjet eksportuese. Sigurisht që kjo gjë do të shoqëroret me reduktim të të ardhurave në arkën e shtetit. Pasojat në tregun vendas do të jenë afatgjata dhe do të jetë e pamundur të kompensohen me disa efekte pozitive të përkohshme.”

Shoqatat e bizneseve theksojnë se mungesa e transparencës dhe injorimi i makro impakteve ekonomike lë shteg për dyshime dhe për këtë arsye kërkohet ndërhyrje për të analizuar dhe frenuar këtë trend i cili konsiderohet i rrezikshëm për ekonominë e vendit.

Konkretisht kërkohet analizë e detajuar mbi situatën dhe impaktin që sjell në ekonomi; hetim dhe transparencë për faktorët natyralë dhe jo natyralë që ndikojnë; komunikim me i plotë dhe më i gjerë nga Banka e Shqipërisë me publikun dhe grupet e interesit;  vendimmarrje nga organet që mund të normalizojnë situatën siç janë Banka e Shqipërisë dhe Ministria e Financave. Letra është firmosur nga shtatë shoqata të biznesit.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.