BMW ndërton fabrikën e parë ekologjike në botë në Hungari – Automjetet që do të prodhohen do të jenë elektrike

Prodhuesi gjerman i makinave BMW po ndërton fabrikën e parë të automobilave ekologjike në botë në Debrecen, Hungari, ku makinat do të prodhohen tërësisht pa përdorimin e lëndëve djegëse fosile. Fabrika pritet të fillojë prodhimin e automobilave elektrikë të BMW nga viti 2025.

Për të siguruar që fabrika të përdorë vetëm energji të rinovueshme, BMW planifikon të gjenerojë një pjesë të konsiderueshme të saj në vend, duke përfshirë panelet diellore, si dhe të përdorë ruajtjen e energjisë, sipas një raporti të Reuters.

Njoftimi vjen në mes të tensioneve të BE-së me Rusinë mbi luftën në Ukrainë dhe përpjekjeve të saj për të reduktuar varësinë nga karburantet fosile ruse.

Milan Nedeljkoviç, anëtar i bordit për prodhimin në BMW, thotë se projekti i fabrikës në Debrecen e bën prodhuesin e automjeteve “një pionier të qartë” në prodhimin e qëndrueshëm të makinave. “Debreceni është padyshim një nga projektet tona kryesore kur bëhet fjalë për qëndrueshmërinë. Por ne gjithashtu kemi reduktuar në mënyrë drastike emetimet tona në përgjithësi në vitet e fundit dhe i kemi vendosur vetes synime ambicioze për të ardhmen”, tha ai.

BMW planifikon të ulë emetimet e karbonit me 80% deri në vitin 2030

BMW synon të ulë emetimet e CO2 për automjetet e prodhuara me 80% nga nivelet e 2019 deri në vitin 2030, me një ulje prej 40% që pritet që në vitin 2025, tha Nedeljković, duke shtuar se kjo kërkon që kompania të vazhdojë të punojë në përmirësimin e efikasitetit të saj të energjisë dhe rritjen e përdorimit të energjisë së gjelbër.

Fabrika e Debrecen do të funksionojë sipas konceptit të ri të prodhimit të BMW, të quajtur iFACTORY, i cili po zbatohet në të gjitha fabrikat e BMW Group në mbarë botën. Ai përfshin efikasitetin, qëndrueshmërinë dhe dixhitalizimin, sipas Nedeljković.

BMW dëshiron që e ardhmja e saj të jetë “mbështetëse, e gjelbër dhe dixhitale”, që do të thotë të jetë efikas dhe fleksibël, duke përdorur sistematikisht energjinë e gjelbër dhe duke përdorur inteligjencën artificiale në prodhim, shpjegon ai.

N.Xh / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.