“Boom” i udhëtimeve nga ajri në 5 vitet e fundit – Fluks i lartë pasagjerësh në Aeroportin e Rinasit

Që prej vitit 2019 e deri më sot, ka pasur një rritje të konsiderueshme të pasagjerëve që përdorin transportin ajror për të udhëtuar. Krahasuar me llojet e tjera të transportit, duket se ai ajror po përdoret gjithnjë e më tepër nga shqiptarët në rastet e përshkimit të distancave shumë të largëta.

Nga 3.3 milionë pasagjerë që kanë udhëtuar me transport ajror në vitin 2019, gjatë vitit të shkuar u numëruan gjithsej 7.2 milionë. Ndërsa vetëm në tre muajt e parë të këtij viti, rreth 1.9 milionë shtetas shqiptarë dhe të huaj udhëtuan me avion. Viti 2020 shënoi një rënie drastike të numrit të udhëtarëve (rreth 2.2 milionë më pak), për shkak të pandemisë covid-19. Këto shifra të ulëta do të vijonin deri në fund të vitit 2021, teksa në 2022-in u llogaritën gjithsej 5.2 milionë hyrje-dalje të pasagjerëve.

Niveli i lartë i kërkesës për të udhëtuar në linjë ajrore, është shoqëruar edhe me rritjen ndër vite të kompanive ajrore që operojnë në Shqipëri. Nga viti 2019 ka pasur hyrje dhe dalje të vazhdueshme të kompanive nga tregu ajror shqiptar. Në periudhën korrik-shtator 2023, vlerësohet të kenë operuar më tepër kompani se në vitet e tjera, 21 konkretisht. Ndërsa aktualisht, në Shqipëri operojnë vetëm 19 shoqëri ajrore nga 20 që operonin një tremujorin e fundit të një viti më parë. Nga këto shifra rezulton se 1 kompani ajrore ka dalë përkohësisht nga tregu i transportit ajror, duke mos kryer asnjë fluturim në qiellin shqiptar përgjatë këtyre muajve.

Aeroporti Ndërkombëtar i Tiranës në Rinas vazhdon të mbajë peshën më të madhe të trafikut ajror. Megjithëse hapja e aeroportit të ri në Kukës në vitin 2021 pritej që ta lehtësonte pak këtë peshë dhe të ofronte fluturime me kosto më të ulëta, kjo nuk ka ndodhur. Aktualisht, ky aeroport nuk ka aktivitet fluturimesh dhe raportohet për humbje të konsiderueshme të ardhurash që prej momentit të krijimit. Ndërkohë, deri në fund të vitit 2024 parashikohet që të përfundojë edhe ndërtimi i Aeroportit Ndërkombëtar të Vlorës, që pritet të nisë nga funksionimi pranverën e vitit të ardhshëm.

Padyshim që fluksi në rritje i turistëve ka ndikuar në shifrat e larta të hyrje-daljeve. Vetëm në 5 muajt e parë të vitit Shqipërinë e kanë vizituar rreth 3.3 milionë turistë, 973 mijë prej të cilëve vetëm në muajin maj.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.