BRICS: Milionerët do të rriten në 10 vitet e ardhshme – Vendet që sfidojnë rendin global dhe vendosen si një rival i fortë i G7

BRICS sfidon G7 dhe për sa i përket numrit të milionerëve. Sipas parashikimeve numri i milionerëve në vendet BRICS pritet të rritet me 85% gjatë 10 viteve të ardhshme. Aktualisht ka 1.6 milion njerëz në bllok me mbi një milion në asete të investueshme 

Më shumë se në vendet e pasura të G7-ës, numri i milionerëve pritet të rritet në vendet në zhvillim të grupit BRICS në dekadën e ardhshme, sipas një raporti të fundit nga Henley & Partners. Numri i milionerëve në vendet BRICS – të cilat kolektivisht mbajnë 45 trilion dollarë pasuri të investueshme – parashikohet të rritet me 85% gjatë 10 viteve të ardhshme, sipas të dhënave të konsulencës së migracionit të investimeve në raportin e publikuar në partneritet me New World Wealth.

Blloku BRICS, i cili përbëhet nga Brazili, Rusia, India, Kina dhe Afrika e Jugut, u zgjerua për të përfshirë Egjiptin, Etiopinë, Iranin, Emiratet e Bashkuara Arabe këtë vit dhe do t’i bashkohet Arabisë Saudite. Aktualisht ka 1.6 milion njerëz në bllok me mbi një milion në asete të investueshme. Parashikimi 85% për vendet e BRICS do të jetë rritja më e lartë e pasurisë së çdo blloku apo rajoni globalisht.

Për krahasim, G7, i cili mbante 110 trilion dollarë pasuri të investueshme në dhjetor 2023, pritet të shohë rritjen e numrit të milionerëve me 45% gjatë dekadës së ardhshme, sipas të dhënave të Amolis. Vendet më të pasura në botë marrin pjesë në G7: Kanadaja, Franca, Japonia, Italia, SHBA, Mbretëria e Bashkuar dhe Bashkimi Europian.

BRICS po sfidon rendin global dhe po e vendos veten si një sfidues i fortë për G7 dhe institucionet e tjera ndërkombëtare, sipas ekspertëve. India kryeson rritjen e pasurisë, me një rritje prej 110% të pasurisë për frymë deri në vitin 2033, e ndjekur nga Arabia Saudite, ku pasuria për frymë parashikohet të zgjerohet me mbi 105% gjatë së njëjtës periudhë. Emiratet e Bashkuara Arabe janë në një trajektore rritjeje prej 95%, ndërsa pasuria e Kinës dhe Etiopisë pritet të rritet përkatësisht me 85% dhe 75%.

Gjatë dekadës së fundit, zgjerimi i pasurisë private të Kinës ka udhëhequr rritjen midis vendeve të BRICS me një rritje marramendëse prej 92%, ndërsa India doli e dyta me një zgjerim prej 85% gjatë së njëjtës periudhë. Emiratet e Bashkuara Arabe pasuan në vendin e tretë me një rritje prej 77% në pasuri. Vendet e tjera të BRICS, si Afrika e Jugut dhe Irani, kanë parë rënie të popullsisë së tyre milionere që nga viti 2013.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.