Britania “udhëheq” tregun e pasurive të paluajtshme – Blerësit ndërkombëtarë po përfitojnë nga mundësitë

Mbretëria e Bashkuar duket e gatshme të udhëheqë një ringjallje europiane të pasurive të paluajtshme këtë vit pasi investitorët ndërkombëtarë kthejnë kapitalin në tregun e tensionuar të pronave të rajonit.

Një rënie e parashikuar e normave të interesit dhe një ringjallje modeste ekonomike do të nxisë flukset hyrëse nga investitorët e huaj që kërkojnë të kapitalizojnë në nivele gjithnjë e më tërheqëse të çmimeve. Ky është përfundimi i një studimi të ri nga firma ndërkombëtare e pronave Savills.

Investitorët amerikanë, izraelitë, japonezë dhe tajvanezë do të udhëheqin ‘garën’, duke shënuar një rikthim prej 20% në aktivitetin e investimeve në pasuri të paluajtshme në vitin 2024, teksa po derdhin para në Britani, Gjermani, Spanjë dhe Holandë, sipas hulumtimit.

Britania u rendit si destinacioni kryesor europian për investimet ndërkufitare në Anketën e Synimeve të Investitorëve Europianë të CBRE 2024, me investitorët që tregojnë për normat e saj të ulëta dhe potencialin e lartë të kthimit. Ajo u pasua nga Gjermania, Polonia, Spanja dhe Holanda. Londra u cilësua si qyteti më tërheqës i ndjekur nga Parisi, Madridi, Amsterdami dhe Berlini, zbuloi sondazhi.

Mbretëria e Bashkuar tani parashikohet të tërheqë një të tretën – ose rreth 13 miliardë dollarë – të investimeve të jashtme të vitit 2024 vetëm nga SHBA, sipas vlerësimeve nga ‘Knight Frank’. Gjermania, Spanja dhe Holanda do të jenë përfituesit e radhës më të mëdhenj të parave të gatshme të SHBA.

Investimet globale ndërkufitare të pasurive të paluajtshme arritën në 196.3 miliardë euro gjatë vitit, 40% më pak se mesatarja pesëvjeçare. Rënia ishte më e theksuar në Europë, Lindjen e Mesme dhe Afrikë, ku flukset hyrëse ishin 59% më të ulëta. Kjo krahasohet me rënien prej 56% të parë në Amerikë dhe rënien prej 12% të regjistruar në Azi Paqësor.

Një total prej 65.2 miliardë eurosh u investuan në Europën kontinentale në vitin 2023, shumica e të cilave e kishin origjinën nga blerësit ndërkufitarë ndër-europianë, kryesisht në Francë dhe Spanjë. Më pak se gjysma -40% erdhën nga jashtë kontinentit – përqindja më e ulët që nga viti 2010.

Megjithatë, kjo prirje pritet të ndryshojë pasi institucionet ndërkombëtare dhe investitorët individualë kanë vendosur të kthehen në treg pasi Banka Qendrore Europiane dhe Banka e Anglisë tregojnë shenja uljeje të normave.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.