Brukseli refuzon propozimin e Kinës – KE i thotë “jo” Pekinit për blerjen e makinave elektrike me çmim minimal

Kristi Ceta/SCAN

 

Brukseli hodhi poshtë një propozim nga qeveria kineze që automjetet elektrike të importuara të prodhuara në Kinë të shiten me një çmim minimal prej 30,000 euro, një lëvizje që Pekini shpresonte se do të shmangte vendosjen e tarifave të BE muajin e ardhshëm.

Komisioni Evropian tha se kishte hedhur poshtë ofertat e çmimeve minimale nga prodhuesit e EV në Kinë një muaj më parë, si pjesë e një hetimi kundër subvencioneve që ka futur Pekinin dhe Bashkimin Evropian në mosmarrëveshjen e tyre më të madhe tregtare të dekadës.

Detaje specifike të kompromiseve që ofrohen në negociatat mes të dyja palëve nuk janë raportuar më parë. Makinat elektrike kushtojnë mesatarisht më pak se gjysma e kostos në Kinë sesa në Evropë dhe Shtetet e Bashkuara, sipas shifrave të vitit 2023 nga firma e të dhënave JATO Dynamics.

Prodhuesit e makinave të vendit përfitojnë nga një sërë avantazhesh në kosto, nga aksesi lokal në lëndët e para dhe bateritë, deri te subvencionet nga Pekini. Çmimi mesatar me pakicë i një makine elektrike me bateri në Kinë ishte rreth 32,000 euro në gjysmën e parë të 2023.

Në të kundërt, çmimi mesatar me pakicë i një makine elektrike me bateri në Evropë ishte 66,000 euro, sipas të dhënave të JATO. Pjesa më e madhe e modeleve më të lira në zhvillim, nuk do të dalin në treg para vitit 2025, me Volkswagen që synon një automjet 20,000 euro në 2027.

Duke refuzuar propozimin kinez, Brukseli tha në atë kohë se nuk kishte të bënte vetëm me çmimet që prodhuesit e makinave vendosin, por edhe me subvencionet që ata morën për prodhimin e tyre.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.