Bursa e energjisë, ende pa licencë – Operimet tregtare parashikohet të nisin në nëntor, ERE: Plotësoni dokumentet!

Pavarësisht se në muajin nëntor duhet të nisë funksionimin, Bursa Shqiptare e Energjisë – ALPEX nuk është licencuar ende në veprimtarinë e operimit të tregut të energjisë elektrike. Ndërkohë që, në aplikimin e kryer pranë Entit Rregullator të Energjisë janë konstatuar një sërë mangësish në dokumentacion, që janë një parakusht për të marrë autorizimin përkatës.

Në mesin e muajit korrik, ERE ka nisur procedurat e licencimit, por ka kërkuar dorëzimin e dokumenteve që mungojnë, ku ndër të tjera bën pjesë edhe Akti i Themelimit. Po ashtu, në lidhje me dëshminë që vërteton mundësinë për të zhvilluar të gjitha procedurat operacionale, kontraktuale ose marrëdheniet e aksesit, shoqëria duhet të dokumentojë në ERE mekanizmat e saj për mbikëqyrjen e tregut, procedurat dhe kontrollet për mbrojtjen e informacionit konfidencial.

Nisja e operimeve në muajin nëntor për tregun e ditës në avancë parashikohet në raportin vjetor të ERE-s, ndërkohë që në muajin janar 2023 parashikohet të nisë tregtimi për tregun e Kosovës dhe bashkimi i të dy tregjeve Shqipëri-Kosovë. Po ashtu, parashikohet që në dhjetor të vitit 2023 të nisë tregtimi i energjisë elektrike brenda të njëjtës ditë për tregun e Shqipërisë dhe dy muaj më pas të bëhet bashkimi i tregjeve brenda të njëjtës ditë për të dy tregjet.

Ngritja e bursës së energjisë nënkupton listimin e prodhuesve të energjisë elektrike, çka do të rrisë konkurrencën si dhe do të lehtësojë blerjen e energjisë nga të gjithë bizneset e liberalizur që sigurojnë vetë sasinë e nevojshme të energjisë. Ngritja e saj ka tejkauar çdo afat ligjor, ndërkohë që tashmë funksionimi i këtij instrumenti ka një rëndësi edhe më të veçantë, pasi data 1 janar shënoi daljen në treg të lirë të rreth 7500 bizneseve të lidhur në tensionin 20 KV.

Prej kohësh, përfaqësues të këtyre bizneseve kërkojnë informacion mbi afatet se kur do të nisë operimi i bursës, ndërsa liberalizimin e tyre në një kohë kur mungojnë kushtet që duhet të plotësojë tregu në këtë drejtim, sikurse është edhe mungesa e bursës, e kanë konsideruar si të papranueshme.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.