Bursat europiane, të kujdesshme – Ekonomia e eurozonës bie me 0.1% në T3, punësimi rritet me 0.3%

Bursat europiane po karakterizohen nga kujdesi në sesionin e sotëm, për shkak të të dhënave jo shumë optimiste mbi ekonominë e Eurozonës. Gjithashtu, investitorët po presin të dhënat mbi inflacionin në SHBA, që do të publikohen më vonë gjatë ditës së sotme.

Indeksi pan-Europian Stoxx 600 po qëndron në rritje me rreth 0.2%, ndërsa sektori i lëndëve të para kryeson fitimet, në rritje me rreth 1%. Referuar të dhënave të Eurostat, Prodhimi i Brendshëm Bruto i rregulluar sezonalisht në Eurozonë ra me 0.1%, në tremujorin e tretë të këtij viti, krahasuar me tremujorin e dytë, ndërsa punësimi u rrit me 0.3%.

Ndërsa për të gjithë Bashkimin Europian, rritja ekonomike nuk ndryshoi, ndërsa punësimi u rrit me 0.2%. Krahasuar me të njëjtin tremujor të një viti më parë, PBB-ja e rregulluar sezonalisht u rrit me 0.1% si në Eurozonë ashtu edhe në BE. Ndërkohë, shumica e tregjeve në rajonin e Azi-Paqësorit patën një tendencë në rritje, ndërsa investitorët ishin në pritje të bisedimeve tregtare mes Kinës dhe Shteteve të Bashkuar.

Presidenti amerikan, Joe Biden dhe Presidenti i Kinës, Xi Jinping do të takohen këtë javë në San Francisco, që do të jetë hera e parë në rreth një vit. Referuar të dhënave të tjera, vendet e lira të punës në Mbretërinë e Bashkuar ranë me 58 mijë njësi, gjatë tremujorit të tretë të këtij viti.

Ndërsa norma totale e papunësisë mbeti e pandryshuar në 4.2%, ndërsa shkalla e punësimit ra lehtë në 75.7%. Përsa i përket korporatave, Vodafone raportoi një rritje prej 4.7% në të ardhurat nga shërbimet për tremujorin e dytë fiskal, pasi Gjermania, tregu më i madh i kompanisë britanike të telekomunikacionit, iu rikthye rritjes.

Kompania ripërsëriti udhëzimin se, për të gjithë vitin fitimet do të jenë të pandryshuara në rreth 13.3 miliardë euro. Megjithatë, aksionet e Vodafone ranë me mbi 1%, pasi analistët mbeten të pakënaqur nga përpjekjet për ristrukturimin e kompanisë, borxhit të konsiderueshëm dhe fluksit të ulët të parave.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.