Jeni, në nivelin më të ulët në 3 dekada – Investitorët po presin të dhënat mbi inflacionin në SHBA

Jeni japonez po gjendet nën presion edhe në sesionin e sotëm, pasi investitorët po presin të dhënat mbi inflacionin në SHBA, që mund të ofrojnë një lehtësim për këtë monedhë, e cila po qëndron në nivelin më të ulët që nga viti 1990.

Në anën tjetër, edhe euro po qëndron në nivelin më të lartë në 15 vitet e fundit, përballë jenit japonez. Autoritetet japoneze, në shtator të vitit të kaluar ndërhynë në tregun e monedhës për të rritur jenin për herë të parë që nga viti 1998, pasi një vendim i Bankës së Japonisë për të ruajtur politikën e saj monetare ultra lehtësuese e çoi jenin deri në 145 për dollar. Banka qendrore ndërhyri sërish në tetor të vitit 2022, pasi jeni preku nivelin më të ulët në 32 vitet e fundit.

Ecuria e tregut të monedhave, gjatë ditës së sotme mund të përcaktohet nga të dhënat mbi inflacionin në SHBA, që mund të japin një panoramë më të qartë mbi normat e interesit. Shefi i Rezervës Federale, Jerome Powell dhe politikëbërësit e tjerë janë përpjekur ditët e fundit të kundërshtojnë pritshmëritë e tregut se banka qendrore në SHBA kishte përfunduar me ciklin agresiv të rritjes së normave. Analistët mendojnë se reagimi i dollarit ndaj të dhënave mbi inflacionin do të jetë asimetrik, ndërsa pozitat do të vijojnë të jenë të forta.

Edhe të dhënat mbi shitjet me pakicë në SHBA do të japin më shumë informacion mbi gjenden e kërkesës në ekonominë amerikane, e cila ka treguar shenja elasticiteti përballë rritjes së kostos së huamarrjes.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.