Caktohen çmimet e energjisë për bizneset e liberalizuara – “Kursi i këmbimit” i ul lehtë për klientët e 35KV, asnjë ndryshim për tensionet e tjerë!

Enti Rregullator i Energjisë ka miratuar çmimet, me të cilat do të faturohen në muajin qershor bizneset që kanë dalë në treg të lirë energjie, por që gjithsesi furnizohen nga OSHEE, që luan rolin e Furnizuesit të Mundësisë së Fundit.

Sipas vendimit, bizneset që janë të lidhur në tensionin 20, 10 dhe 6 KV energjinë e muajit maj do e paguajnë me 18.26 lekë/kwh, një çmimi i njëjtë me muajin maj.

Ndërkohë që, klientët e lidhur në tensionin 35 KV, do të faturohen me 31.75 lekë/ kwh, duke pësuar një rënie me 0.39 lekw/kwh në raport me muajin maj, ndikuar nga kursi i këmbimit.

Për klientët e lidhur në tensionin 35 KV energjia sigurohet nga importi, çka bën që kjo kategori klientësh të faturohet shumë shtrenjtë. Ndërkohë që, për kategorinë e bizneseve, që dolën në tregun e liberalizuar në muajin janar të këtij viti, Furnizuesi i Shërbimit Universal e siguron energjinë nga KESH, me një çmim fiks prej 12 lekë/kwh, teksa muaji qershor shënon edhe përfundimin e kësaj marrëveshjeje.

Publikisht Ministria e Infrastrukturës dhe Energjisë ka deklaruar se do të ketë një zgjatje të saj, por deri më tani në ERE nuk është depozituar dokumenti i rinovuar.

Ndërkaq, gjatë mbledhjes u rikërkua që OSHEE të zbatojë metodologjinë e përcaktimit të çmimit të energjisë, duke mos përfshirë kostot e disbalancave.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.