Trashëgimia kulturore e Durrësit, menaxhim me Fondacion – Plani përfshin Amfiteatrin, Forumin Bizantin, Banjat e Shtigjet

Ministria e Kulturës po planifikon që të ndryshojë menaxhimin e pasurisë historiko-kulturore të Durrësit.  Administrimi i tyre do t’i kalojë një fondacioni, me qëllim rritjen e cilësisë së menaxhimit por edhe të të ardhurave

Qeveria shqiptare po planifikon që të ndjekë modelin e Butrintit me menaxhimin e trashëgimisë kulturore të Durrësit. Në Planin e Menaxhimit të Integruar të Zonave Arkeologjike A dhe B të Qytetit të Durrës 2021-2028, parashikohet krijimi i një fondacioni nga ministria e Kulturës.

“Grupi i ri i atraksioneve të trashëgimisë kulturore do të funksionojë si një njësi organizative nën kujdesin e kësaj organizate, e cila do të mbikëqyrë valorizimin e të gjithë trashëgimisë kulturore të Durrësit, Amfiteatrit Romak, Forumit Bizantin dhe Banjave Romake, Shtigjeve Urbane.

Ky është rezultat i diskutimeve mes palëve të interesuara, partnerit strategjik dhe institucionit shtetëror të përfaqësuar nga Ministria e Kulturës” shkruhet në Planin që ka kaluar në konsultim publik.

Fondacioni i ri mund të marrë fonde si për punë kapitale ashtu edhe për punë operative nga palë të treta, si fonde të tjera, universitete, fonde private, e të ngjashme, duke siguruar kështu fonde për funksionimin e menaxhimit të sitit.

Prandaj, një detyrë kryesore e Drejtorit Menaxhues të fondacionit është të sigurojë që financimi të merret nga burime të ndryshme (si në aspektin e projekteve kapitale ashtu edhe në mbështetjen e të ardhurave) në mënyrë që të zbutet rreziku afatgjatë i investimit.

“Kjo është praktikë e zakonshme për fondacionet në nivel global, veçanërisht me ato që kanë nevojë për injeksione të rregullta për projekte konservimi, siç është rasti me Durrësin” evidentohet në plan.

Kështu, fondacioni siguron si kapital ashtu edhe shuma të të ardhurave për operacionet dhe aktivitetet. Çdo fond që gjeneron trashëgimia kulturore do t’i kthehet fondacionit si tepricë operacionale.

Plani parashikon se mund të kërkohet që këto fonde të riinvestohen në mirëmbajtjen dhe funksionimin e zonës ose të përdoren nga Ministria e Kulturës në projektet e konservimit të siteve të tjera.

Ky model, evidentohet më tej në plan, ofron një nivel më të madh autonomie se sa ekziston aktualisht dhe siguron menaxhim lokal që mund të ketë reagim më të shpejtë. E rëndësishmja, ky model ofron një ndryshim shumë të nevojshëm të qeverisjes për të adresuar sfidat e fundit me të cilat përballet qyteti në lidhje me trashëgiminë e tij kulturore.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.