Cilët janë sektorët me më shumë punonjës me pagë minimale? – Inspektime në mbi 10 mijë biznese, mbi 41 mijë të punësuar të këqpaguar

Rreth 1/5  e të punësuarve në sektorin privat rezultojnë  me pagë minimale. Referuar të dhënave zyrtare të Inspektoratit Shtetëror të Punës, gjatë vitit 2022,  punësimi me pagë minimale rezulton evident në 19.7 % të punëmarrësve të evidentuar në punë në rreth 10 mijë subjekte private të inspektuara gjatë vitit që lamë pas.

Konkretisht, në total janë kontrolluar mbi 212 mijë punëmarrës, ku nga të cilët 41.837 kanë rezultuar të deklaruar në sistemin tatimor me pagën minimale. Por cilët janë sektorë që kanë më shumë të keqpaguar? Sektori bujqësi, pyje, peshkim zë vendin e parë me 62.2 për qind kundrejt numrit total të punëmarrëseve në këtë sektor.

Në vendin e dytë renditet sektori hotel, tregti, bare dhe restorante me 31 për qind kundrejt totalit të punonjësve në sektor, duke u ndjekur nga  ndërtimi me 25.7 për qind; financë shërbime dhe sigurime me 24.9 për qind dhe ndërmarrje prodhuese me 18.9 për qind. Ndërsa sektorët e tjerë si transport, telekomunikacion, miniera, karriera, elektricitet, gaz, ujë zënë një peshë më të vogël.

Në Prill 2023 hyn në fuqi dhe vendimi për rritjen e pagës minimale në 40 mijë lekë, si masë për të ruajtur fuqinë punëtore në vend. Pagat e ulëta apo nëndeklaruara janë konsideruar si shkaku kryesor që biznesi po vuan mungesën e punonjësve. Pak ditë më parë, kryeministri Edi Rama u ka bërë apel bizneseve të që të rrisin pagat dhe të mos shfrytëzojnë fuqinë punëtore nëse nuk duan që të falimentojnë.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.