Cilët kryebashkiakë do e kenë jetën “të vështirë” prej këshillave? – Fredi Beleri do ketë kundër 9 Këshilltarë, pro 7. Njësoj Kavaja, Hasi, Mirdita e Fushë Arrëzi

Fitorja masive e Partisë Socialiste në zgjedhjet vendore është shtrirë si te bashkitë e fituara, ashtu edhe të këshillat bashkiake, gjithësesi, një pjesë e kryetarëve nuk do ta kenë jetën të lehtë për shkak se mund të kenë shpesh kundër këshilltarët. Më së shumti do ta vuajë këtë shqetësim Kreu i Bashkisë Himarë Fredi Beleri, i cili nëse do mbyllë problemet me SPAK, do t’i duhet të përballet me një Këshill shumë të fortë kundër. Partia Socialistë ka siguruar 9 vende në Këshillin Bashkiak të Himarës kundrejt 7 të koalicionit Bashkë fitojmë, ndërkohë që ka me vete edhe disa aleatë.

Mjaft të vështirë do ta ketë vendimmarrjen edhe Kryetari i Bashkisë së Kavajës, Këshilli i së cilës dominohet nga Partia Socialiste me 13 mandate kundrejt 9 të koalicionit Bashkë Fitojmë. Në këtë Bashki ka fituar 3 mandate edhe Partia Demokratike, ashtu si dhe Partia Agrare, ndërkohë që 2 mandate të tjerë i përkasin Partisë Socialdemokrate të Tom Doshit.

Dhe pikërisht mandatet në këshilla të Partisë Socialdemokrate do u vështirësojnë vendimmarrjen edhe shumë kryebashkiakëve në veri. Në Has, PSD ka fituar 4 mandate, të cilët bashkë me dy mandatet e Partisë Socialiste do ja bëjë shumë të vështirë vendimmarrjen kreut të Bashkisë, i cili ka me vete vetëm 4 mandate të Koalicionit Bashkë Fitojmë. Ndërkohë që PSD do të jetë e rëndësishme edhe në Fushë Arrëz ku me 3 mandatet e veta, plus 2 socialiste, do dominojnë tërësisht këshillin, ku koalicioni Bashkë Fitojmë ka fituar vetëm një mandat.

Situata shfaqet e ngjashme edhe në Mirëditë, Ku Partia Socialiste dhe ajo Socialdemokrate numërojnë secila nga 4 mandate, në një kohë që Koalicioni Bashkë Fitojmë numëron vetëm 2.

Gjithashtu, edhe në Mirditë përcaktuese e vendimmarrjeve të kryetarit të BF do të jetë vota e 8 këshilltarëve të PSD e PS.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.