Çmimet e naftës bien nga frika e recesionit – OPEC+ nuk ndryshon kuotat e prodhimit për dy muaj

Çmimet e naftës ranë të premten, duke vijuar në humbjet e një dite më parë, pasi frika e shtuar e një recesioni po mbizotëron në tregje. Kontratat e së ardhmes së naftës së papërpunuar Brent ranë 43 cent, në 108.60 dollarë për fuçi, ndërsa nafta e papërpunuar e Teksasit Perëndimor për dorëzimin e gushtit ra në 105.16 dollarë për fuçi.

Të enjten, grupi i prodhuesve të OPEC +, përfshirë Rusinë, ranë dakord t’i përmbahen strategjisë së prodhimit pas dy ditë takimesh. Megjithatë, OPEC+ shmangu diskutimin e politikës nga shtatori e tutje. Më parë, OPEC+ vendosi të rrisë prodhimin çdo muaj me 648,000 fuçi në ditë në korrik dhe gusht, nga një plan i mëparshëm për të shtuar 432,000 fuçi në ditë.

Presidenti i SHBA Joe Biden do të bëjë një udhëtim me tre ndalesa në Lindjen e Mesme në mes të korrikut që përfshin një vizitë në Arabinë Saudite, duke e shtyrë politikën energjetike në qendër të vëmendjes ndërsa Shtetet e Bashkuara dhe vendet e tjera përballen me çmimet e larta të karburantit që po nxisin inflacionin. Biden tha të enjten se nuk do të ushtrojë presion ndaj Arabisë Saudite për të rritur prodhimin e naftës për të frenuar çmimet në rritje.

Çmimet e naftës pritet të qëndrojnë mbi 100 dollarë për fuçi këtë vit pasi Europa dhe rajonet e tjera përpiqen të heqin dorë nga oferta ruse, tregoi një sondazh i Reuters, megjithëse rreziqet ekonomike mund të ngadalësojnë rritjen.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.