Gjermania nuk ka fonde për të ndihmuar familjet – Paketa e tretë e masave do të miratohet në vitin 2023

Gjermania nuk ka fonde për të financuar një paketë të tretë masash në mbështetje të familjeve në vështirësi për vitin 2022. Deklarata u bë nga ministri gjerman i financave Christian Lindner në një intervistë për mediat në vend.

Ai u shpreh se paketa e re e masave do të mundësohet vetëm në vitin 2023, por është e qartë se këtë vit nuk ka më burime të disponueshme në buxhet.

Qeveria gjermane ka reaguar ndaj rritjes së kostos së jetesës si pasojë e luftës në Ukrainë dhe problemave në zinxhirin global të furnizimit, me dy paketa masash prej miliarda eurosh këtë vit.

Masat konsistojnë në dhënien e një sasie parash për familjet në vështirësi në formë asistence, benzinë më ekonomike dhe bileta për transportin publik me cmime më të reduktuara për të ndihmuar qytetarët që të përballen me rritjen e cmimit të energjisë elektrike dhe ngrohjes.

Gjatë një takimi të ministrave të financës të G7-ës në muajin maj, ministri gjerman Lindner deklaroi se Gjermania duhet të gjejë një rrugëdalje nga situata e krizës. Kjo në përpjekje për të risjellë ekonominë më të madhe europiane brenda vitit 2023 në kufijtë e borxhit të parashikuar nga kushtetuta.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.