Çmimet e Ryanair, të ulëta edhe këtë verë – O’Leary: Një “ndjesi recesioni” mund të kufizojë rritjen e tarifave

Drejtori i Përgjithshëm i Ryanair, Michael O’Leary, tha se një “ndjesi recesioni në Evropë” mund të jetë një faktor në rritjen më të ngadaltë të çmimeve të biletave të avionëve pasi kompania arriti fitime vjetore rekord, duke tejkaluar pritshmëritë.

O’Leary paralajmëroi dy javë më parë se tarifat e verës mund të jenë më të ulëta se rritja prej 5% deri në 10% që pritej deri në fund të prillit. Linja ajrore tha se parashikimi i saj i ri i rritjes së çmimeve gjatë verës nga viti në vit është “shumë i varur” nga rezervimet e minutës së fundit në këtë stinë.

“Është pak e habitshme që çmimet nuk kanë qenë më të larta dhe ne nuk jemi plotësisht të sigurt nëse kjo është vetëm ndjesia e konsumatorit apo një ndjesi recesioni në Evropë, por ne ende shohim që kërkesa maksimale për udhëtime gjatë korrikut dhe gushtit është e lartë”, tha O’Leary.

Linja ajrore irlandeze, më e madhja në Evropë për nga numri i pasagjerëve, tha gjithashtu se do të kishte 23 avionë më pak se numri që Boeing do të dorëzonte deri në fund të korrikut.

O’Leary tha se Ryanair do të marrë kompensim “modest” nga Boeing për vonesat, por se shuma konfidenciale nuk pasqyron sasinë e humbjeve të pësuara nga detyrimi për të ulur së fundmi rritjen e parashikuar të trafikut deri në fund të marsit 2025 në 198-200 milionë pasagjerë nga 205 milionë që ishte më parë.

Ryanair transportoi një numër rekord prej 184 milionë pasagjerësh në vitin financiar të përfunduar më 31 mars, duke kontribuar në rritjen prej 34% në fitimin vjetor prej 1.92 miliardë euro.

Ryanair uli parashikimin e fitimit pas taksave në një interval prej 1.85 miliardë dhe 1.95 miliardë euro në janar pasi disa agjentë udhëtimesh ‘online’ papritur ndaluan shitjen e fluturimeve të kompanisë.

Kristi Ceta/SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.