Çmimet në Shqipëri, më të ulëta se Europa! – Inflacioni rezultoi 4,7% në gusht sipas metodës së Eurostat

Indeksi i Harmonizuar i Çmimeve të Konsumit për muajin gusht ka vijuar prirjen rënëse. Nga 5% që ishte në korrik, në muajin e tetë të vitit regjistroi nivelin 4,7%. Shifrat e mësipërme rezultojnë sipas llogaritjeve me metodën e Eurostat, pasi sipas INSTAT, për gushtin inflacioni në bazë vjetore ishte më i ulët, në nivelin prej 4%.

Rritja më e madhe e çmimeve gjatë muajit gusht, që kulmoi edhe më boom-in e turizmit në vend, vërehet në grupin “Ushqime dhe pije joalkoolike” me 2,8%, “Hotele, kafene dhe restorante” me 0,64%, “Argëtim dhe kulturë” me 0,62% dhe “Mobilim, pajisje shtëpie dhe mirëmbajtje” me 0,38%. Ndërkohë, që grupet e tjera regjistruan rritje të papërfillshme të çmimeve. Nga ana tjetër, ashtu si në korrik edhe gjatë muajit gusht, çmimet e grupit të transportit regjistruan ulje me 0,5%

Krahasuar me mesataren e eurozonës, prej 5,2% Shqipëria rezulton me normë inflacioni më të ulët, ashtu si edhe me mesataren e Bashkimit Europian që ishte 5,9%, vendi ynë ka normë më të ulët dhe qendron në vendin e 20-të ndër 27 shtetet anëtare të bllokut.

Çmimet në Shqipëri rezultojnë më të ulta krahasuar me vende të tilla si Franca, Irlanda, Portugalia, Finlanda, Greqia, Italia, Austriaetj. Ndërsa, nga ana tjetër, Suedia, Holanda, Qipro, Belgjika, Spanja, apo Danimarka kanë çmime më të lira se vendi ynë.

Hungaria vijon të jetë vendim me çmime më të shtrenjta në Europë, ku për gushtin inflacioni u regjistrua në nivelin 14.2%.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.