Deutsche Bank “ofron” crypto për klientë institucionalë – Aktualisht, tregu vlen rreth 1.1 trilionë dollarë

Deutsche Bank ka bashkëpunuar me firmën zvicerane të cryptove Taurus për të ofruar shërbime ruajtëse për cryptovalutat e klientëve institucionalë dhe asetet e tokenizuara. Ky partneritet nënkupton se Deutsche Bank, për herë të parë, do të jetë në gjendje të mbajë një numër të kufizuar cryptomonedhash për klientët e saj, si dhe versione të shënjuara të aktiveve tradicionale financiare. Tregtimi i cryptove nuk është në “planet e menjëhershme” të bankës.

Tregjet e cryptove kanë luftuar për t’u rikuperuar nga seria e kolapsit të vitit të kaluar në firmat kryesore, të cilat i lanë investitorët me humbje të mëdha dhe i shtynë ligjvënësit në mbarë botën të bëjnë thirrje për më shumë rregulla. Megjithatë, firma të ndryshme financiare kryesore po flasin për mundësinë e blockchain – teknologjia që qëndron pas cryptomonedhave – për t’u përdorur në tregtimin dhe shlyerjen e aktiveve tradicionale financiare.

Kreu global i shërbimeve të letrave me vlerë të Deutsche Bank, Paul Maley u shpreh se meqenëse hapësira e aseteve dixhitale pritet të përfshijë triliona dollarë aktive, ajo do të shihet si një nga prioritetet për investitorët dhe korporatat.

Tregu i cryptove tashmë vlen rreth 1.1 trilionë dollarë, nga një nivel rekord pak mbi 3 trilionë dollarë në nëntor 2021. Sipas Maley, fokusi nuk është vetëm te cryptovalutat, por tek mbështetja e klientëve në ekosistemin e përgjithshëm të aseteve dixhitale.

Rregullatorët e SHBA-së kanë paralajmëruar bankat të jenë të kujdesshme për rreziqet e likuiditetit nga klientët e lidhur me crypto. Maley tha se Deutsche Bank po vazhdon me kujdes dhe në përputhje me frymën e rregulloreve që përcaktojnë këtë klasë aktivesh. Sipas tij, dizajni i produktit dhe natyra e kujdestarisë për klientët, do të sigurojë që të mos ketë rrezik të kontaminimit të aktiviteteve të tjera të bankës.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.