Mungesa e erës rrit çmimin e energjisë – Tarifat ranë në fillim 2023-shit, por nuk do të vijojnë edhe vitin e ardhshëm

Mungesa e erës këtë fundjavë bëri që kostot e energjisë të rriten në të gjithë Europën, me çmimet e energjisë elektrike në Gjermani që arritën nivelin më të lartë në shtatë muaj. Në tregun gjerman, çmimi i një megavatorë energji elektrike arriti në 150 euro, një shifër që nuk është parë që nga mesi i shkurtit. Mbrëmjen e së hënës, çmimi pritet të arrijë në maksimum 524 euro për MWh.

Nga njëra anë dëmet klimatike, nga ana tjetër dëmet ekonomike. Ditët e fundit çmimi i gazit, për herë të tretë brenda një muaji, është rritur ndjeshëm për shkak të grevave në uzinat në Australi. Vendi është një nga eksportuesit kryesorë në Lindjen e Largët – nga Kina në Japoni – dhe ndalimi i transformimit të metanit në gaz natyror të lëngshëm për anijet e transportit shkakton rritje të çmimeve të cilat, në gusht, madje shënuan 20 % rritje.

Realisht, çmimet e gazit kanë vazhduar të ‘rrëshqasin’ që nga gushti, pasi kur duket se marrëveshjet janë më afër nënshkrimit, çmimet zbresin menjëherë. Por kjo nuk ka penguar rritjen e faturave, siç shihet në përditësimin e fundit në të cilin normat u rritën me 2.8%. Në të njëjtën kohë, çmimet e naftës së papërpunuar po rriten gjithashtu, falë një uljeje prej gati një milion fuçi në ditë të vendosur në korrik nga OPEC, për të rritur çmimet. Në përgjithësi, paqëndrueshmëria e tregjeve të karburanteve fosile, e nxitur edhe nga pasiguritë që lidhen me pushtimin rus të Ukrainës, është e destinuar të vazhdojë vitin e ardhshëm. Kjo është tabloja e prezantuar nga Komisioni Europian në “Parashikimin Ekonomik të Verës 2023”.

Ekonomia europiane, nënvizon Brukseli, vazhdon të tregojë njëfarë elasticiteti përballë goditjeve të frikshme që ka pësuar vitet e fundit, por ka humbur vrullin. Megjithëse çmimet e energjisë ranë në fillim të vitit 2023, ato nuk pritet të vazhdojnë të bien në vitin 2024. Nëse ndodh ndonjë gjë, ato do të fillojnë të rriten sërish, të nxitura nga çmimet më të larta të naftës.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.