Do kthente “trurin” e thithte investimet, dështon Agjencia e Diasporës – Nuk arriti të siguronte votën e emigrantëve dhe ambicie të shumta, mbyllet pas 5 vitesh

U krijua me qëllimet ambicioze për të kthyer në Shqipëri trurin e larguar në vite, për të thithur investimet e emigrantëve të suksesshëm, për të mundësuar pjesëmarrjen e tyre në votime, regjistrimin e tyre në ccdo vend ku jetojnë, deri edhe për të hapur një gazetë e një kanal televiziv dedikuar atyre, por nuk arriti asnjë prej këtyre qëllimeve. Madje aktualisht në Kuvend është depozituar propozimi për Shfuqizmin e ligjit të vitit 2017 përmes të cilit u krijua Agjencia Kombëtare e Diasporës, nën përgjegjësinë e drejtpërdrejtë të Kryeministrit.

Gjithësesi, projetligji nuk e lidh mbylljen e Agjencisë me suskeset apo dështimet e saj, por me faktin se me ndryshimet që i janë bërë në vitin 2022 përgjegjësive të Ministrisë për Evropën dhe Punët e Jashtme, është kjo e fundit përgjegjëse për diasporën, në një kohë që më parë i përkiste ministrit të Shtetit për Diasporën.

Përgjegjësitë dhe detyrat e parashikuara në këtë ligj, por edhe të normave ligjore në fuqi për diasporën do të vijohen të realizohen nga vetë institucioni i Ministrisë për Evropën dhe Punët e Jashtme, nëpërmjet një riorganizimi të brendshëm, me krijimin e një strukture të posaçme varësie për të gjitha çështjet e diasporës, sqaron relacioni shoqërues i projektligjit.

Më tej, në projektligj nënvizohet se krijimi i kësaj Agjencie ka lindur i nevojshëm në kushtet kur ministri përgjegjës për diasporën ishte ministër pa portofol, çka nënkupton, ndër të tjera, mungesën e burimeve njerëzore të brendshme dhe nevojën për ngritje dhe mbështetje nga strukturat jashtë kësaj ministrie.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.