Dobësimi i Euros, kush fiton e kush humbet – Përfitojnë kredimarrësit, importuesit e Qeveria, humbasin kush varet nga remitancat dhe eksportuesit

Ndërsa monedha e përbashkët evropiane ka shënuar në çmim rekord në raport me lekun, ky zhvillim prek në mënyrë të drejtpërdrejte shumë kategori: duke nisur nga qytetarët, si në rastin e depozitave, ashtu dhe të kredive, emigrantët, studentë, bizneset, importuese apo eksportuese, deri te qeveria, veçanërisht duke parë rritjen e nivelit të borxhit të jashtëm. Por cilët janë humbësit dhe fituesit kryesorë.

Fitues nga mbiçmimi i lekut është çdo individ a biznes që të ardhurat i ka në lekë, e huatë në euro. Portofoli i kredive sipas monedhës, për vitin 2021, evidenton se kredia në

valutë vijon të ketë peshën më të madhe në totalin e kredisë në vend me 51.1%. Duke qenë se pjesa dërrmuese e këtyre kredive janë dhënë në euro, një numër i konsiderueshëm qytetarësh e biznesesh po paguajnë këste më të ulëta me nënçimin e saj. Përfitues të drejtpërdrejtë janë edhe bizneset importuese, të cilat mund të blejnë më shumë mallra në BE me nënçmimin e monedhës së përbashkët. Përfitues janë edhe personat që marrin shërbimet shëndetësore në Euro, ashtu si dhe të rinjtë që studiojnë jashtë kufijve e që pagesat i bëjnë në monedhën e përbashkët evropiane. Ndërkohë që përfituesja e madhe është Qeveria. Duke parë se rreth 70% e borxhit të jashtëm prej 9.8 miliardë eurosh është pikërisht në monedhën e përbashkët evropiane, ajo do gëzojë kushte më të lehta të shërbimit të borxhit publik.

Ndërkohë që humbësit janë qytetarët e varur nga remitancat e ata që shohin zhvleftësimin e depozitave në euro në bankat shqiptare. Nga emigracioni hyjnë ço vit afërisht një total remitancash në vlerat 700-800 milionë euro, një pjesë e mirë e të cilave depozitohet në sistemin bankar shqiptar. Vetëm gjatë vitit 2021 depozitat në sistemin bankar shqiptar janë shtuar me rreth 10%, një pjesë e mirë e të cilave në euro.

Por humbësit e mëdhenj janë eksportuesit, të cilët shesin në euro, por kostot apo shpenzimet i kanë në lekë dhe në mënyrë të veçantë ata që depozitat i kanë në euro, e detyrimet në lekë.

Lorenc Rabeta / SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.