Pandemia, ndihma shtetërore preku fundin – Shifra më e ulët nga 2017-ta,  225 milionë dollarë më pak se 2020-ta

Ndihma shtetërore e dhënë nga qeveria për sektorë të veçantë, kategoritë në nevojë apo sipërmarrjet ka pasur luhatje drastike, ku gjatë vitit që lamë pas ka rënë në nivelin më të ulët të 5 viteve të fundit. Ndërkohë që e kundërta ka ndodhur gjatë 2020-ës, ku niveli i ndihmës shtetërore dhe për shkak të nisjes së pandemisë dhe masave të marra në mbështetje të bizneseve të cilët me urdhër te qeverisë u mbyllën për një periudhë të caktuar për të parandaluar përhapjen e COVID-19  ka qenë rekord.

Konkretisht, sipas raportit vjetor  “Për ndihmat shtetërore të vitit 2021”, vihet re se pavarësisht se pandemia vijoi dhe qytetarët e bizneset u përballën me problematika të shumta gjatë vitit që lamë pas, qeveria është treguar dorështrënguar sa i takon mbështetjes së dhënë duke i lënë qytetarët dhe bizneset “zbuluar”. Përfitues i ndihmës shtetërore është çdo ndërmarrje ose individ që, nëpërmjet akteve dhe masave të ndërmarra nga shteti, siguron përfitime financiare dhe ndihmat shtetërore jepen kryesisht duke përdorur subvencione dhe grante;  Përjashtim nga taksat, shtyrje taksash, ulje e shkallës së tatimit ose zbritje e kontributit në sigurimet shoqërore; si dhe garancitë shtetërore .

Por si ka rezultuar viti që lamë pas? Nga të dhënat vihet re e ndihma e dhënë nga shteti gjatë 2021-shit ka qenë vetëm 4.6 miliardë lekë, me një rënie prej rreth 26 mld lekësh apo 225 milionë dollarë, krahasimisht me 2020-ën. Shkalla e ndihmës shtetërore ndaj PBB-së u ul nga 1.87 % më 2020-n, në 0.25 % në vitin 2021.

Elisabeta Dosku / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.