Dollari, në nivelin më të lartë në 2 muaj e gjysmë – Rezerva Federale pritet të mos ndryshojë politikën monetare javën e ardhshme

Dollari amerikan i është rikthyer fitimeve gjatë sesionit europian, duke u ngjitur në nivelin më të lartë në 2 muaj e gjysmë. Ndërkohë, dollari australian po qëndron në nivelin më të lartë në 3 javët e fundit, pasi Rezerva Federale e Australisë rriti normën bazë të interesit në nivelin më të lartë në 11 vitet e fundit, prej 4.1%. Euro vijon të kuotohet poshtë 1.07 dollarëve, ndërsa paundi këmbehet me rreth 1.24 dollarë.

Analistët e tregjeve kanë ndryshuar sërish parashikimet në lidhje me politikën monetare në Rezervës Federale në SHBA dhe tashmë presin 19% mundësi, që banka qendrore të rrisë normën bazë të interesit në takimin e javës së ardhshme, nga rreth 60% javën e kaluar. Të dhënat e publikuara në SHBA treguan se sektori i shërbimeve u ngadalësua ndjeshëm gjatë majit, ndërsa edhe kërkesat e reja shënuan rënie, shenja se inflacioni po “ftohet”.

Ndër zhvillimet e tjera, lira turke preku nivelin më të ulët histori, duke u këmbyer në rreth 22 përballë dollarit. Në tregun e kriptomonedhave, bitcoin u rrit ndjeshëm me rreth 6% në sesionin e kaluar, duke u ngjitur sërish në mbi 27 mijë dollarë. Komisioni i Letrave me Vlerë dhe Shkëmbimeve (SEC) paditi Coinbase, duke e akuzuar platformën më të madhe të kriptomonedhave se funksiononte në mënyrë të paligjshme. Ky veprim erdhi vetëm një ditë pasi rregullatorët paditën Binance, platformën më të madhe të këmbimit të kriptomonedhave në botë dhe CEO-n e saj Changpeng Zhao.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.