Dollari pritet të publikojë humbje javore – FED: Rritja e interesave do të jetë e ngadaltë dhe e qëndrueshme

Dollari amerikan po qëndron në rënie të lehtë në sesionin e sotëm, duke u tërhequr nga niveli më i lartë në 2 muaj e gjysëm, që preku një ditë më parë. Gjithashtu, monedha e gjelbër pritet të publikojë humbjet e para javore që nga fillimi i janarit. Dollari u gjend nën presion sepse presidenti i Rezervës Federale të Atlantas, Raphael Bostic deklaroi se qasja e duhur në lidhje me normat e interesit duhet të jetë një rritje e ngadaltë dhe e qëndrueshme.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 104.8 nga rreth 105.3 që e nisi javën, duke humbur rreth 0.4% të vlerës. Analistët e anketuar nga Reuters deklarojnë se forcimi i dollarit amerikan është i përkohshëm dhe monedha do të dobësohet deri në fund të vitit, për shkak të përmirësimit të ekonomisë globale dhe pritshmërive se Rezerva Federale do të ngadalësojë hapin e rritjes së interesave.

Pas këtyre zhvillimeve, euro është ngjitur sërish në mbi 1.06 dollarë, ndërsa në sesionin e kaluar preku nivelin më të ulët në 2 muaj, pranë 1.05 dollarëve. Në tregun e kriptomonedhave, bitcoin ka rënë ndjeshëm drejt 22,400 dollarëve, ndërsa ethereum po tregtohet në rreth 1570 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.