DPSHTRR: Mbi 186 mijë mjete kanë kryer kontrollin teknik – Çregjistrohen në mënyrë të përhershme rreth 4500 mjete me moshë 22 vjeçare

Drejtori i përgjithshëm i Shërbimit të Transportit Rrugor (DPSHTRR) Blendi Gonxhja bëri të ditur se, gjatë periudhës Janar- Shtator 2023, janë paraqitur për testim e kontrollit teknik 186,174 mjete.

Referuar raportit të kontrollit teknik të mjeteve rrugore, nga totali i mjeteve 147,275 janë automjete; 20,747 kamion; 9,321 motomjete; 4,455 autobusë; 3,624 rimorkio; 752 mjete ndërtimi/punime toke.

DPSHTRR informon se 4,519 mjete me moshë 22 vjeçare janë çregjistruar në mënyrë të përhershme.

Ndërsa 58,698 ose 31.5% e totalit të mjeteve, janë ngelur/refuzuar, për problematika si: mangësi vizuale e funksionale, sistem frenimi e drejtimi, gomat, sistem shkarkimi i gazrave, rrjedhje vajra, ulje e kilometrazhit, defekte, etj.

DPSHTRR ka bërë me dije për qytetarët se ndalohet rreptësisht ulja e kilometrazhit; odometri jofunksional; ndryshimi kontstruktiv dhe errësimi i xhamave pa certifikim, si dhe orvatjet për rryshfete.

Gonxhja u shpreh se, “mision i punës tonë është për të kontribuar në rrugë të sigurta dhe kjo mbetet prioritet i të gjithë veprimtarisë sonë në vijueshmëri”, teksa risolli në vëmendje të drejtuesve të mjeteve që të rezervojnë online orarin për kontrollin teknik të mjetit në e-albania.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.