“Ekonomia globale përballet me vështirësi” – FMN: Kina dhe përshkallëzimi i luftërave janë rreziqet kryesore

Ekonomia globale është e vendosur për një vit tjetër rritjeje të ngadaltë por të qëndrueshme, sipas parashikimeve të Fondit Monetar Ndërkombëtar, me fuqinë e SHBA-së që e shtyn prodhimin botëror përmes erërave të kundërta nga inflacioni i lartë i vazhdueshëm, kërkesa e dobët në Kinë dhe Europë dhe pasojat nga dy luftërat rajonale.

FMN parashikon rritjen e PBB-së reale globale, prej 3.2% për 2024 – 2025, e njëjta normë si në 2023-shin. Parashikimi i vitit 2024 u rishikua në rritje me 0.1 pikë përqindjeje nga vlerësimi i mëparshëm i Perspektivës Ekonomike Botërore në janar, kryesisht për shkak të një rishikim të rëndësishëm në rritje në perspektivën e SHBA.

Kryeekonomisti i FMN-së, Pierre – Oliver Gourinchas, u shpreh se ekonomia globale vazhdon të shfaqë një elasticitet të jashtëzakonshëm me rritjen e qëndrueshme dhe inflacionin në rënie, por shumë sfida janë ende përpara.

Një përshkallëzim i mundshëm i konfliktit në Lindjen e Mesme pas sulmit me raketa dhe dron të Iranit ndaj Izraelit mund të ketë një ‘efekt të fortë’ në kufizimin e rritjes, tha ai, duke shtuar se do të rriste çmimet e naftës dhe inflacionin, duke shkaktuar një politikë më të ashpër monetare nga bankat qendrore.

Sekretarja e Thesarit e SHBA-së, Janet Yellen, paralajmëroi sanksione të reja ndaj Teheranit në ditët në vijim, të cilat mund të kufizojnë aftësinë e tij për të eksportuar naftë.

Raporti përshkruante një ‘skenar negativ’ në të cilin një përshkallëzim në Lindjen e Mesme do të çonte në një rritje prej 15% të çmimeve të naftës dhe kostot më të larta të transportit do të rrisnin inflacionin global me rreth 0.7 pikë përqindjeje.

FMN parashikon që inflacioni total mesatar global do të bjerë në 2.8% deri në fund të 2024-ës nga 4% vitin e kaluar dhe në 2.4% në 2025-ën.

FMN-ja rishikoi parashikimin e saj për vitin 2024 për rritjen e SHBA-së në 2.7% nga 2.1% e parashikuar në janar, mbi punësimin dhe shpenzimet konsumatore më të forta se sa pritej. Ajo pret që efekti i vonuar i politikës më të shtrënguar monetare dhe fiskale të ngadalësojë rritjen e SHBA në 1.9% në 2025-ën, megjithëse ky ishte gjithashtu një rishikim në rritje nga vlerësimi 1.7% në janar.

Presidentja e Bankës Qendrore Europiane, Christine Lagarde, përmendi divergjencën e madhe midis SHBA-së dhe Europës, e cila po përballet me një rritje më të ngadaltë dhe një rënie më të shpejtë të inflacionit.

Parashikimet e fundit të FMN-së e vërtetojnë këtë, me një rishikim në rënie të parashikimit të rritjes së eurozonës 2024 në 0.8% nga 0.9% në janar, kryesisht për shkak të ndjenjës së dobët të konsumatorit në Gjermani dhe Francë. Parashikimi i rritjes së Britanisë për vitin 2024 u rishikua me 0.1 pikë përqindjeje në 0.5% mes normave të larta të interesit dhe inflacionit të lartë të qëndrueshëm.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.