ERE “rrëzon” OSSH-në për lidhjet e reja elektrike – ISHTI e akuzonte për monopol, ERE: Të zbatohen detyrimet që kërkon qeveria

Përpara vënies në shfrytëzim të lidhjes së re elektrike, çdokush duhet të pajiset me  “deklaratën e konformitetit” që lëshohet në përfundim të instalimit nga instaluesit e certifikuar”.

Ky detyrim ka qenë gjithmonë i përcaktuar me vendim qeverie, por ai nuk zbatohej nga Operatori i Sistemit të Shpërndarjes, duke sjellë përplasje me Inspektoratin Shtetëror dhe Industrial, që është institucioni përgjegjës për monitorimin e instalimeve elektrike.

Nisur nga kjo situatë, ISHTI kërkoi ndërhyrjen e Entit Rregullator të Energjisë, që miratoi disa dispozita ligjore shtesë, në mënyrë që vendimi i qeverisë të zbatohet.

Më herët, përfaqësues të Inspektoratit Shtetëror dhe Industrial, teksa komentuan kërkesën e bërë ndaj ERE-s, kanë deklaruar për TV SCAN se me procedurat aktuale, lidhjet e reja të energjisë në rrjet janë monopolizuar nga Operatori i Shpërndarjes së Energjisë Elektrike, duke mos zbatuar legjislacionin në fuqi.

Po ashtu, sipas tyre kjo sjell një sërë problemesh në drejtim të mirëmbajtjes, rrjetit, por edhe të sigurisë të njerëzve.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.