Euro rifiton terrenin e humbur – Monedha e përbashkët europiane vijon forcimin ndaj lekut

Euro ka rifituar sërish terren ndaj lekut gjatë ditës së mërkurë, duke vijuar tendencën e forcimit. Sipas kursit zyrtar të Bankës së Shqipërisë 1 euro u ble me 112,8 dhe u shit me 114,02 lek. Tendenca e vlerësimit të euros ndaj lekut u regjistrua që ditën e hënë, ndërkohë në gjysmën e parë të këtij muaji preku nivelet më të ulta historike, që kulmuan më 11 maj në nivelin prej 110.63 lekë. Rënia i detyrohej prurjeve të mëdha të valutës në treg, një ecuri thuajse normale në periudhat parazgjedhore.

Por, një ndër sektorët që preket nga mbiçmimi i lekut kundrejt monedhave të tjera janë eksportuesit, përfshirë eksportuesit e shërbimeve dhe mallrave. Për shkak të faktit se të ardhurat e tyre vijnë në euro dhe dollar, ndërkohë që shpenzimet janë në lekë, nënçmimi i monedhave të tjera ka ulur të ardhurat e tyre në lekë, ndërkohë që shpenzimet nuk kanë ndryshuar, përkundrazi mund të jenë rritur për shkak të inflacionit, rritjes së kostove të pagave dhe shpenzimeve të tjera të lidhura me blerjet e brendshme. Për këtë qëllim eksportuesit kanë kërkuar nga Banka e Shqipërisë me Ministria e Financave, masa mbështetëse për të frenuar humbjet, që sipas tyre janë disa dhjetra milionë euro.

Gjatë një takimi javën e kaluar në Ministrinë e Financave me përfaqësues të eksportuesve, ministrja Ibrahimaj njoftoi marrjen e dy masave konkrete që janë ngrirja dhe mospagimi nga eksportuesit i kësteve të tatimit mbi fitimin për periudhën e mbetur të vitit 2023, si dhe përshpejtimi i rimbursimit të TVSH-së.

Për sa i përket trendit forcues të monedhës vendase, sipas analizave të kryera, Banka e Shqipërisë gjykon se ky pasqyron përmirësimet strukturore të ekonomisë dhe të tregjeve financiare shqiptare, të shfaqura këto në forcimin e pozicionit të jashtëm të ekonomisë dhe në rritjen e besimit të publikut në monedhën kombëtare.

Sipas Bankës Qendrore, ky forcim nuk ka cenuar rritjen e eksporteve shqiptare përkundrazi, ai ka ndihmuar në kontrollin e inflacionit në vend, i cili ka qenë dhe mbetet më i ulti në rajon, duke ndihmuar në ruajtjen e fuqisë blerëse të familjeve shqiptare.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.