Euro rritet drejt 1.08 USD – Inflacioni në SHBA dhe bankat qendrore, përcaktuese për ecurinë

Euro është rritur ndjeshëm përballë dollarit amerikan, gjatë sesionit të sotëm, duke u ngjitur në rreth 1.08. Investitorët janë në pritje të të dhënave mbi inflacionin në SHBA dhe takimeve të bankave qendrore më vonë gjatë javës.

Ndërkohë, paundi britanik po këmbehet me rreth 1.2560 dollarë. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 103.7, në rënie me rreth 0.3%.

Paundi britanik ka gjetur një mbështetje nga të dhënat që treguan se rritja e pagave në Mbretërinë e Bashkuar u ngadalësua, gjatë muajit të kaluar, me hapin më të shpejtë në 2 vitet e fundit. ky raport ofron më shumë hapësira për Bankën e Anglisë që të lehtësojë politikat monetare, gjatë gjysmës së parë të vitit 2024.

Dollari amerikan ka pasur një tendencë në rënie që kur u publikua inflacioni për tetorin, por gjeti një mbështetje nga të dhënat mbi punësimin që u publikuan të premten e kaluar. Analistët janë plotësisht të sigurt se Rezerva Federale do ta mbajë normën bazë të interesit në intervalin 5.25%-5.50%, por presin të mësojnë se kur mund të vijë ulja e parë e tyre.

Ekonomistët e anketuar nga Reuters parashikojnë se, inflacioni do të jetë i pandryshuar, gjatë nëntorit, ndërsa inflacioni bazë parashikohet në 4%, ende shumë larg objektivit të Rezervës Federale prej 2%. Tregjet vlerësojnë rreth 50% shanse për uljen e interesave në takimin e marsit dhe 77% shanse për një ulje në maj.

Edhe Banka Qendrore Europiane dhe Banka e Anglisë pritet gjerësisht të mos ndryshojnë politikat monetare në takimet e së enjtes. Ndër monedhat e tjera, franga zvicerane preku nivelin më të lartë në 9 vitet e fundit, përballë euros, javën e kaluar, ndërsa po tregtohet në rreth 0.94.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.