Fasha të reja të tatimit mbi pagat – Reduktim taksash për të mirëpaguarit, lehtësi edhe për kategori të tjera
Të gjithë punonjësit me paga të larta në sektorin publik apo privat do të përfitojnë reduktim të tatimit, i cili përkthehet në një shtesë të të ardhurave mujore neto që ata marrin.
Ministra e Financave po diskuton disa lehtësi për të punësuarit në vend, ku parashikohet që duke nisur nga muaji Korrik, të rritet kufiri i sipërm i pagave mbi të cilat aplikohet tatimi.
Por sa është tatimi mbi pagat aktualisht dhe çfarë pritet të ndryshojë?
Aktualisht për të punësuarit me pagë deri në 50 mijë lekë bruto, norma tatimore është zero. Për të punonjësit me pagë mujore nga 50,001 – 60,000 lekë/muaj aplikohet tatim në masën 13 % e shumës mbi 35 mijë lekë. Për punonjësit që paguhen mbi 60 mijë lekë në muaj, deri në 30 mijë lekë aplikohet normë tatimore zero dhe nga 30 – 200 mijë lekë tatohen 13% e shumës mbi 30 000 lekë. Ndërsa për pagat mbi 200 mijë lekë, norma e aplikuar është 23 %.
Sipas burimeve të SCAN TV nga Ministria e Financave, është hedhur për diskutim opsioni që për pagat e larta kufiri i tatimit prej 23 % të aplikohet mbi nivelin 250 mijë lekë në muaj.
Po ashtu, një tjetër diskutim i cili është në tryezë lidhet me lehtësimin e të punësuarve të tjerë, të cilët i kap detyrimi për deklarimin dhe pagesën e Tatimit mbi të Ardhurat Personale me Deklaratën Individuale Vjetore të të Ardhurave (DIVA), ku sipas të dhënave zyrtare të Administratës Tatimore këtë detyrim për vitin 2023 e kanë në total 73.790 individë. Në këtë kategori, pritet të bëhen disa masa lehtësuese, që lidhen me zbritje të tatimit që duhet të paguajnë, nëse plotësojnë disa kritere të caktuara.
Aktualisht zbatohen disa zbritje të shpenzimeve nga të ardhurat e krijuara nga punësimi, dhe një prej tyre është kompensimi për çdo fëmijë në ngarkim individit më pak se 18 vjeç, prej 48 000 lekësh. Sipas Ministrisë së Financave masat lehtësuese për të punësuarit ndërmerren si rrjedhojë e performancës shumë e mirë e të ardhurave tatimore.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.