AKSHI, 279 milionë lekë tender për inteligjencë artificiale – Nga përgatitja e akteve, te gjenerimi i raporteve. Përse do të shërbejë në institucionet shqiptare?

Me zhvillimet e shpejta teknologjike, “Agjenda Digjitale Shqipëri 2022-2026”, do të nxisë investimet në zonat kyçe të informatikës së avancuar dhe përpunimit të të dhënave, inteligjencës Artificiale (AI), sigurisë kibernetike dhe aftësive të përpunuara digjitale të nevojshme për t’i zhvilluar ato.

Ndaj dhe Agjencia Kombëtare e Shoqërisë së Informacionit (AKSHI) ka shpallur tender me vlerë 279 milionë lekë me objekt “Përdorimi i Inteligjencës Artificiale në procesin e Transpozimit të Aqcuis për Integrimin Europian”, me fondet e Buxhetit të Shtetit.

Fondi limit i këtij tenderi është mbi 279 milionë lekë pa TVSH ku sipas Dokumenteve të Tenderit theksohet se vlera e implementimit do të jetë mbi 258 milionë lekë pa TVSH si dhe vlera e mirëmbajtjes do të jetë rreh 21 milionë lekë pa TVSH.

Por cilat janë objektivat e këtij tenderi dhe se çfarë do të arrihet në finalizimin e tij?

Sipas dispozitave të dokumenteve tenderuese, theksohet se objektivi I përgjithshëm I këtij projekti është implementimi i teknologjisë së inteligjencës artificiale në institucionet publike, ku ka për qëllim përshpejtimin e procesit të transpozimit të akteve të BE.

Ndërkohë përdorimi i këtij shërbimi përmes përdorimit të kapaciteteve të NLP (Natural Language Processing), do të mundësojë automatizimin, grumbullimin, seleksionimin e të gjithë aktve/ligjeve të sjella nga BE dhe aksesimin e këtyre kodeve. Por më konkretisht, ky automatizim përfshin shtimin e teknologjisë AI në institucionet publike për menaxhimin e kërkesave dhe dhënies së informacioneve të dëshiruara, të marra nga aktet e BE ndaj të gjithë përdoruesve të platformës përgjatë gjithë kohëzgjatjës së këtij projekti.

E kësisoj përdorimi i inteligjencës artificiale do të synojë në përgatitjen e akteve për përafrim në proceset e grupimit dhe kategorizimit të akteve dhe rregullores së Acquis, filtrimin e informacioneve sipas prioritetit dhe përkthimin e akteve. Gjithashtu përdorimi i inteligjencës artificiale në krahasimin e legjislacionit aktual shqiptar në atë të Acquis për të identifikuar boshllëqe, mospërputhje, ngjashmëritë etj.

Diamila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.