FBI gjen më shumë se 10,000 dokumente qeveritare në pronën e Donald Trump – Ndër to edhe dosje të klasifikuara “Top Secret”

Agjentët federalë zbuluan më shumë se 10,000 dokumente qeveritare në pronën e ish-presidentit Donald Trump në Mar-a-Lago, sipas një inventari të sapo publikuar.

Në një dosje gjyqësore, Departamenti i Drejtësisë publikoi inventarin më të detajuar të sendeve që u gjetën nga agjentët e FBI-së gjatë kontrollit të tyre më 8 gusht në resortin në Florida të Jugut të Trump.

Agjentët e FBI-së gjetën mbi 100 të dhëna të klasifikuara të cilat përfshinin shenja që shkruanin “KONFIDENCIAL”, “SEKRET” ose “TOP SEKRET” dhe mbi 10,700 dokumente ose foto të paklasifikuara.

Midis artikujve ishin 48 dosje bosh të shënuara “KLASIFIKUAR”.

Përveç dokumenteve qeveritare, agjentët e FBI-së gjetën gjithashtu qindra artikuj gazetash, reviste dhe shtypi, media të shkruara, si dhe fotografi, veshje, dhurata dhe libra të përzier me të dhënat.

“Grupi hetimor ka shqyrtuar materialet e sekuestruara në vijimësi të hetimeve të tij në vazhdim, duke vlerësuar rëndësinë dhe karakterin e çdo sendi të sekuestruar dhe duke marrë përcaktime paraprake në lidhje me rrugët hetimore të sugjeruara ose të garantuara nga karakteri dhe natyra e sendeve të sekuestruara”, shkroi Departamenti i Drejtësisë në një letër që shoqëron inventarin.

Letra vijon: “Materialet e sekuestruara do të vazhdojnë të përdoren për të çuar më tej hetimin e qeverisë dhe grupi hetimor do të vazhdojë të përdorë dhe vlerësojë materialet e sekuestruara ndërsa do të ndërmarrë hapa të mëtejshëm hetimor”.

Një gjykatës federal vendosi të zhbllokojë një raport statusi nga ekipi që hetonte se si Trump trajtonte informacionet që kishin të bënin me sigurinë kombëtare të vendit. Gjykatësi nuk vendosi mbi një kërkesë të ekipit ligjor të Trump për të caktuar një master të posaçëm për të renditur provat e mbledhura nga agjentët e FBI-së dhe për të përcaktuar nëse ndonjë duhet t’i kthehet Trumpit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.