FDA miraton ilaçin e ri të diabetit për njerëzit mbipeshë: Mund të humbasin 15 deri në 24 kilogramë!

Një dozë javore e një medikamenti të miratuar së fundmi nga Administrata e Ushqimit dhe Barnave e SHBA-së, FDA, për trajtimin e diabetit të tipit 2 mund të ndihmojë të rriturit pa diabet të humbin peshë gjithashtu, zbuloi një studim i ri.

Tirzepatide, e cila shitet me emrin e markës Mounjaro, u studiua te njerëzit pa diabet në tre doza: 5, 10 dhe 15 miligramë. Pjesëmarrësit me obezitet ose që ishin mbipeshë dhe morën dozën 5 miligram humbën mesatarisht 16 kilogramë, ata që morën dozën 10 miligram humbën mesatarisht 22 kilogramë dhe pjesëmarrësit në dozën 15 miligram humbën mesatarisht 23.6 kilogramë.

“Pothuajse 40% e individëve humbën një të katërtën e peshës së tyre trupore,” tha bashkëautorja Dr. Ania Jastreboff, bashkëdrejtoreshë e Qendrës Yale për Menaxhimin e Peshës në një konferencë për mediat. “Të dhënat ishin mjaft mbresëlënëse,” tha Dr. Robert Gabbay, shefi mjekësor i Shoqatës Amerikane të Diabetit. “Humbja e peshës që ata patën në këtë studim ishte edhe më e madhe se ajo që ishte parë në studimet e mëparshme të njerëzve me diabet,” tha Gabbay, i cili nuk ishte i përfshirë në studim.

Në përgjithësi, njerëzit pa diabet humbën mesatarisht 15% deri në 20.9% të peshës së tyre fillestare trupore gjatë rrjedhës së provës klinike 72-javore, të rastësishme, e cila u botua të shtunën në The New England Journal of Medicine. Pjesëmarrësit që morën një placebo humbën mes 2.4% dhe 3.1% të peshës së tyre trupore, mesatarisht.

Në krahasim, studimet mbi njerëzit me diabet që përdorën tirzepatide zbuluan se humbën mesatarisht 15% të peshës fillestare të trupit, tha Gabbay. “Ky është një vëzhgim jo i pazakontë,” tha ai. “Ndikimi i medikamenteve të mëparshme për humbjen e peshës është më pak efektiv tek njerëzit me diabet, dhe ne sinqerisht nuk e dimë saktësisht pse”. Megjithatë, ndikimi i tirzepatidit te njerëzit me diabet është ende “i thellë”, tha Gabbay, “duke ofruar shumë më tepër se mjetet e tjera që kemi pasur.”

Doza e vetë-injektuar

Për studimin e ri, injeksione javore të tirzepatidit u testuan në më shumë se 2500 njerëz pa diabet, të cilët kishin një indeks të masës trupore (BMI) mbi 30 ose që ishin mbi 27 BMI dhe kishin të paktën një gjendje shëndetësore të lidhur me peshën, si presioni i lartë i gjakut, kolesterol të lartë ose sëmundje kardiovaskulare. Një masë e raportit lartësi-peshë të një personi, një BMI prej 25 ose më i lartë konsiderohet mbipeshë tek të rriturit.

Në fillim të studimit, pjesëmarrësit kishin një peshë mesatare prej 104.8 kilogramësh dhe BMI mesatare prej 38. Të rriturit në studim i injektuan vetes tirzepatide ose një placebo një herë në javë, duke përdorur “një pajisje të vogël si stilolaps me një gjilpërë të vogël,” tha Gabbay. “Shpimi nga ajo gjilpërë është më pak i dhimbshëm se, për shembull, njerëzit që shpojnë gishtat për të matur glukozën në gjak.”

Njerëzit në studim morën gjithashtu seanca këshillimi për t’i ndihmuar ata të qëndrojnë në një dietë të shëndetshme me një deficit ditor 500 kalori, si dhe të paktën 150 minuta aktivitet fizik çdo javë. Ndërsa kjo sigurisht ndihmoi, nuk shpjegon përmasat e humbjes së peshës të parë në studim, tha Gabbay.

“Lloji i humbjes së peshës që shohim kur njerëzit ushtrojnë dhe ndryshojnë marrjen e kalorive është diku në rendin prej 5% deri në 7%,”, tha ai. “Ky studim tregoi një humbje thellësisht më të madhe në peshë, shumë më e lartë se sa do të imagjinonim me ndryshimet e stilit të jetesës.”

Efektet anësore më të zakonshme të raportuara ishin të përziera, diarre dhe kapsllëk. Midis 2.6% dhe 7.1% e pjesëmarrësve e ndërprenë trajtimin për shkak të ngjarjeve anësore. Mounjaro përmban një paralajmërim në kuti për tumoret e tiroides dhe nuk duhet të përdoret nga njerëz me një histori familjare të kushteve të caktuara të tiroides. CNN

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.